Qazaqstan jerasty sý qoryn qanshalyqty tıimdi paıdalanyp jatyr
ASTANA. KAZINFORM — Quryltaı depýtaty Bota Eleýsizova Premer-mınıstrdiń orynbasary Qanat Bozymbaevtyń atyna jerasty sý resýrstaryn tıimdi paıdalaný jáne qorǵaý máseleleri týraly depýtattyq saýal joldady.
— Elimizdiń jerasty sý áleýeti áli de tolyq paıdalanylmaı keledi. Qolda bar málimetterge sáıkes, Qazaqstandaǵy bekitilgen jerasty sý qorlary táýligine 43,2 mln tekshe metr bolsa, naqty paıdalanylatyn kólemi shamamen 1,5 mln tekshe metr ǵana. Bul bekitilgen qorlardyń nebári 3,5 paıyzy. Ásirese, sý tapshylyǵy baıqalatyn óńirlerde jerasty sýlaryn aýyl sharýashylyǵy men eldi mekenderdiń qajettilikterine tıimdi paıdalaný máselesi ózekti. Sonymen qatar, 2026 jylǵy málimet boıynsha elimizde ıesiz, avarııalyq jáne ózdiginen tógiletin 2256 gıdrogeologııalyq uńǵyma bar. Olardyń ýaqytyly joıylmaýy nemese tıisti tártippen konservatsııalanbaýy sý ysyrabyna alyp keledi jáne qorshaǵan ortaǵa zııan keltirýi múmkin, — dedi Bota Eleýsizova.
Budan bólek, jerasty sýlarynyń monıtorıngin jetildirý, gıdrogeologııalyq derekterdi biryńǵaı tsıfrlyq júıege biriktirý jáne naqty sý alý kólemin baqylaý máseleleri de júıeli sheshimdi talap etedi.
— Osyǵan baılanysty QR Úkimetinen jerasty sý qorlaryn óńirler bólinisinde túgendep, olardyń naqty paıdalanylýyna jáne ıgerý múmkindigine keshendi taldaý júrgizýdi suraımyz. Iesiz jáne avarııalyq uńǵymalardy joıý men konservatsııalaý jumystaryn jedeldetip, olardyń biryńǵaı tsıfrlyq tizilimin qalyptastyrý kerek. Jerasty sýlary monıtorıngin jańǵyrtyp, geologııalyq jáne gıdrogeologııalyq derekterdi biryńǵaı tsıfrlyq júıege biriktirý mańyzdy. Aýyl sharýashylyǵynda jerasty sýlaryn paıdalaný lımıtterin ǵylymı negizde belgilep, naqty sý alý kólemin tsıfrlyq esepke alý men oǵan baqylaý engizý qajet. Sonymen qatar, jerasty sý qorlaryn barlaý jáne baǵalaý jumystaryna bólinetin bıýdjet qarajatynyń tıimdiligine taldaý júrgizýdi suraımyz, — dedi depýtat.
Buǵan deıin elimizde jerasty sýlaryn basqarýdyń jańa tujyrymdamasy qabyldanatynyn jazǵan edik.
