Qazaqstan «Jer saǵaty» dúnıejúzilik aktsııasyna qatysady
NUR-SULTAN. QazAqparat – Búgin jer-jerde dúnıejúzilik «Jer saǵaty» aktsııasy ótip jatyr. Qazaqstan atalǵan ekologııalyq aktsııaǵa 2009 jyldan bastap qatysyp keledi, dep habarlaıdy QazAqparat tilshisi.
«Jer saǵaty» - dúnıejúzilik jabaıy tabıǵat qorynyń (WWF) bastamasymen 2007 jyldan beri búkil álemde ótkizilip kele jatqan eń aýqymdy halyqaralyq ekologııalyq shara.
Atalǵan sharaǵa 180 el, 7 myń qala qatysady.
Jyl saıynǵy dástúr boıynsha naýryz aıynyń sońǵy senbisinde el turǵyndary saǵat 20:30-dan 21:30-ǵa deıin úıi men páterindegi shamdar men turmystyq elektr quraldaryn óshiredi.
Bul aktsııaǵa memlekettik jáne jeke tulǵalar da qoldaý kórsetedi.
Bıyl Qazaqstanda ótetin «Jer saǵaty» aktsııasy ekotýrızm taqyrybyna arnalyp otyr.
Ekotýrıst bolý úshin tabıǵatty saqtaýǵa jáne jergilikti halyqtyń ekonomıkalyq damýyna úles qosý kerek.
Sondaı-aq, aktsııa barysynda Nur-Sultan qalasy boıynsha «Aqorda» rezıdentsııasy, Báıterek, Trıýmfaldy arka, «Astana Opera», Nazarbaev Ýnıversıtetinde jáne qalanyń basqa da iri nysandarynda búkil elektr energııasy óshiriledi.
Al, Almaty qalasynda «Qazaqstan» qonaq úıiniń ǵımaratynda, QBTÝ jáne taǵy basqa iri nysandarda jaryq ýaqytsha sóndiriledi.
Aıta keteıik, dúnıejúzi boıynsha ótetin ekologııalyq aktsııaǵa kez kelgen adam qatysyp, úlesin qosa alady.
Ol úshin jergilikti ýaqyt boıynsha keshki saǵat 20:30-da 1 saǵatqa ǵımarattyń (turǵyn úı, mekeme taǵy sol sııaqty) jaryǵyn sóndirý kerek.
