Qazaqstan jer qoınaýynyń geologııalyq tartymdylyǵy jaǵynan 31 orynda - Á. Isekeshev
ASTANA. QazAqparat - Qazaqstan jer qoınaýynyń geologııalyq tartymdylyǵy jaǵynan 31 orynda tur. Búgin Májilistiń jalpy otyrysynda Investıtsııalar jáne damý mınıstri Áset Isekeshev osylaı málimdedi.
Eske salaıyq, jıynda «Qazaqstan Respýblıkasynyń keıbir zańnamalyq aktilerine jer qoınaýyn paıdalaný máseleleri máseleleri boıynsha ózgerister men tolyqtyrýlar engizý týraly» zań jobasy birinshi oqylymda talqylanǵan bolatyn.
Mınıstrdiń sózine qaraǵanda, zań jobasy jer qoınaýyn paıdalanýshylardyń jumysynda kezdesetin kedergilerdi joıyp, salanyń ulttyq bazasyn jetildirýge, halyqaralyq standarttarǵa ótýge jáne ınvestıtsııalyq klımatty jaqsartýǵa baǵyttalǵan.
«Qazirgi tańda geologııa salasyn memlekettik retteý jaǵynan Qazaqstan 112 eldiń arasynda 87-i orynda bolsa, al jer qoınaýynyń geologııalyq tartymdylyǵy jaǵynan 31 orynda. Al zań jobasyndaǵy ózgeristerdiń qajettiligi álemde bolyp jatqan daǵdarystan ınvestorlar úshin bastalǵan kúresten týyndap otyr. Shıkizattyń uzaq merzimdi tasymalynyń turaqtylyǵy, geologııa salasyndaǵy jumystar men rásimderdiń ashyqtyǵy - búgingi zamannyń talaby»,- dedi Áset Isekeshev.
Onyń aıtýynsha, zań jobasyn ázirleý barysynda avstralııalyq úlgi nazarǵa alynǵan. «Mundaı sheshim bir jarym jyldyq zertteý jumystary men Dúnıejúzilik banktiń usynysy nátıjesinde qabyldandy. Sonymen qatar, búkil álem boıynsha avstralııalyq úlgi úzdik dep sanalady ári bul ınvestorlardyń da bergen baǵasy», - dedi mınıstr.
