Qazaqstan jer qoınaýyn paıdalanýda 2021 jyldyń 1 qańtaryna deıin jergilikti qamtýdaǵy mindettemelerin saqtaıdy - M.Myrzaǵalıev
Búgingi brıfıngte Qazaqstannyń Dúnıejúzilik saýda uıymyna kirýi máselesi sóz bolatyndyǵyn atap ótken ol taqyryp aıasynda uıymǵa múshe bolýdyń munaı-gaz jáne mashına jasaý salalaryndaǵy otandyq kásiporyndarǵa tıgizetin áseri men Úkimet tarabynan kórsetiletin qoldaýlarǵa toqtaldy.
«Ózderińiz biletindeı, DSU-ǵa múshe bolý protsesiniń Qazaqstannyń ekonomıkalyq damýy men básekege qabilettiligin arttyrý úshin mańyzy zor. Alaıda kez kelgen protsestiń eki jaǵy qatar júretinin barlyǵymyz jaqsy bilemiz. Osy oraıda uıymǵa múshe bolý bir jaǵynan otandyq taýar óndirýshilerdiń múmkindikterin arttyrsa, ekinshi jaǵynan synaq bolyp eseptelinedi», - dedi ol.
Sebebi, vıtse-mınıstrdiń atap ótýinshe, bul uıymnyń erejesi jergilikti qamtý máselelesinde memlekettik qoldaýdyń mehanızmderin paıdalanýǵa aıtarlyqtaı shekteýler qoıady.
«Degenmen, Qazaqstan jer qoınaýyn paıdalaný máselesinde 2021 jyldyń 1 qańtaryna deıingi ótpeli kezeńniń sharttaryn paıdalana otyryp, qoldanystaǵy kelisimsharttardaǵy jergilikti qamtý boıynsha mindettemelerdi saqtap qala aldy», - dedi M.Myrzaǵalıev.
Onyń sózine qaraǵanda, atalǵan shart 2015 jyldyń 1 qańtaryna deıin nemese aıaqtalý ýaqytynyń bastapqy merzimine deıin jasalǵan kelisimsharttarǵa qatysty qoldanylady.
