Qazaqstan JEO salý úshin Reseıden nesıe alýy múmkin

ASTANA. KAZINFORM – QR Energetıka mınıstrligi Qazaqstan men Reseı arasyndaǵy Kókshetaý, Semeı jáne Óskemen qalalarynda kómir jaǵatyn jylý elektr ortalyqtaryn salý kelisimin ratıfıkatsııalaý týraly qujattyń jobasyn jarııalady. Osy kelisimge sáıkes, reseılik tarap bul jumysty júrgizýge jeńildikpen qaryz berý múmkindigin qarastyrady.

Jobany iske asyrý boıynsha Qazaqstan tarapynan «Samuryq-Energo» jáne Reseı tarapynan «INTER RAO — Eksport» jaýapty bolyp belgilengen.

Ekeýi de mamandandyrylǵan úlestes kompanııalar qurýǵa quqyly.

Taraptar JEO qurylysynyń barlyq protsesin úsh kezeńge bóldi.

Birinshi kezeń JEO-ny keıinnen kómirden tabıǵı gazǵa aýystyrý múmkindigin eskerip, úsh jobanyń árqaısysy boıynsha qajetti saraptamalar júrgizip, jobalaý qujattamasyn ázirleýdi qamtıdy. 

Bul kezeń «Samuryq-Energo» esebinen júzege asady.

Ekinshi jáne úshinshi kezeńderde — qajetti jabdyqtardy jetkizý, generatsııalaıtyn jabdyqtar men gaz tazartý júıelerin salý-montajdaý jáne iske qosý-jóndeý jumystary josparlanǵan. 

Sonymen qatar, qazaqstandyq tarap Reseı eksporttyq uıymnan «Samuryq-Energo» kepildigimen jáne tapsyrys berýshi quqyqtarynyń kepilimen JEO salýǵa nesıe ala alady.

«Reseı tarapy Reseı Federatsııasynyń zańnamasyna sáıkes, eksportty memlekettik qoldaý tetikteriniń talaptaryn saqtaı otyryp, reseılik qarjylandyrý uıymdary usynatyn nesıeler boıynsha reseılik óndiristiń joǵary tehnologııalyq ónimderin, kelisimsharttar boıynsha jumystar men qyzmetterdi jetkizýdi qarjylandyrý maqsatynda jeńildetilgen (sýbsıdııalanǵan) paıyzdyq mólsherlemelerdi usyný múmkindigin qarastyrady», — dep jazylǵan kelisimde.

Energetıka mınıstrligi JEO salý jumystary ratıfıkatsııalaý rásimi aıaqtalǵannan keıin ǵana bastalatynyn atap ótti.

Osydan keıin ǵana jobalardy qarjylandyrýdyń sharttary men egjeı-tegjeıi belgili bolady.