Qazaqstan jeńil atletıkadan Astanada ótken álemdik týrnırde eki medal jeńip aldy

ASTANA. KAZINFORM — Astanada World Athletics Indoor Tour Gold serııasynyń kezeńi aıaqtaldy. Jeńil atletıkadan álemdik týrnırde Qazaqstan quramasy eki medal jeńip aldy.

Bıiktikke sekirýde úshinshi nátıje kórsetken qos sportshy – Elızaveta Matveeva men Igor Kosolapov. 

Al Davıd Efremov (60 metrge kedergilermen júgirý), Deızı Djepkemeı (3000 metr) jáne Nadejda Dýbovıtskaıa (bıiktikke sekirý) júldege bir qadam jetpeı qaldy.

– Óz elimizde óner kórsetýdi óte jaqsy kóremin, sebebi bizde jankúıerlerdiń erekshe yqylasy bar. Mundaı jarystarda bul qatty seziledi. Árıne, adamdarǵa álem juldyzdaryn kórý qyzyq. Biraq sonymen birge bizdiń sportshylarymyzǵa jankúıer bolyp jatqanyn sezesiń. Bul óte jaǵymdy. Barlyq jankúıerlerimizge alǵys aıtqym keledi. Alańda bolǵandarǵa, teledıdar aldynda otyrǵandarǵa da raqmet aıtamyn.

Júldegerler qataryna enbegenime qaramastan, nátıjeme rızamyn. Sebebi bul – maýsymdaǵy alǵashqy jarys, daıyndyq qıyn boldy. Biraq jaqsy óner kórsettim dep aıta alamyn. Árıne, bul meniń eń jaqsy nátıjem emes, biraq jaraqattan keıin júktelgen mindetterge daıyndalýǵa múmkindigim bolmady. Degenmen, 184 santımetrge sekirdim. Ózimdi maqtan tutamyn (kúledi).

Osylaısha, qysqy týrnırlerde óner kórsetýimdi aıaqtaımyn. Dárigerlermen, bapkerlermen keńese otyryp, tolyq emdelip, jazǵy maýsymǵa deıin densaýlyǵymdy jaqsartýǵa jáne daıyndalýǵa sheshim qabyldadyq. Júktemelerdi aǵzam kótere alatyndaı etip qabyldaýǵa tyrysamyz, ári burynǵydaı jarystardy ótkizip almaýǵa jumys jasaımyz, – dedi jabyq alańdaǵy álem chempıonatynyń qola júldegeri Nadejda Dýbovıtskaıa.

Aıta ketsek, Astana Indoor Meet for Amin Tuyakov Prizes jarysynda barlyq favorıtter jeńis tuǵyryna kóterile almady. Mysaly, eki dúrkin Olımpıada chempıony Andre De Grass (Kanada) jáne Olımpıada oıyndarynyń kúmis júldegeri, úsh dúrkin álem chempıony Nıa Alı (AQSh) júldesiz qaldy. Tanymal kedergimen júgirýshi Alı jaraqatyna baılanysty irikteý kezeńin sátti aıaqtaı almady.

– Ózimdi keremet sezinemin. Qysqa qashyqtyqtaǵy sprınt meniń baǵytym emes. Alaıda nátıjeme rızamyn. Ótken jyly da altynshy oryn alǵan edim (kúledi). Munda bolǵanyma qýanyshtymyn. Jankúıerler óte keremet, kóptegen adamdar sýretke túsýimdi surady… Azııada qanshalyqty kóp jankúıer bar ekenin bildim. Fantastıkalyq atmosfera. Al óner kórsetýge kelsek, bári tamasha. Bul tek bastamasy. Alda kóptegen jarys bar. Sonyń ishinde Tokıoda ótetin álem chempıonaty. 100 jáne 200 metrge júgirý josparymda bar. Barlyǵy endi bastaldy (kúledi), – dedi Andre De Grass.

Astanada barlyǵy 40 elden 100-den astam sportshy qatysty. 

Eske sala keteıik, buǵan deıin Qazaqstan jeńil atletıka kesheninde World Athletics Indoor Tour Gold serııasynyń Astana Indoor Meet for Amin Tuyakov Prizes týrnıri ótip jatqanyn jazǵan bolatynbyz.