Qazaqstan jeńil atletteri Azııa chempıonatynda bas júldeni jeńip aldy

Atalǵan dodada Qazaqstan atletteri 7 altyn, 4 kúmis, 1 qola medalmen jalpy komandalyq esepte birinshi orynǵa ıe boldy.

Azııa chempıonatynyń sońǵy kúninde 4h400 metrlik estafetadan qyzdar altyn alsa, jigitter Katardy alǵa jiberip, kúmis júldege ıe boldy.

Ulttyq quramanyń aǵa bapkeri Lıýbov Nıkıtenko estafeta kezinde qyzdardan Vıktorııa Zıabkına, Elına Mıhına, Svetlana Golendova, Adelına Ahmetovaǵa senim artty.

Bizdiń  sportshylar Ashhabadtaǵy Azııa oıyndarynda qolda turǵan jeńisten tehnıkalyq qatelikterge baılanysty aıyrylyp qalǵan edi. Osy joly ondaı qatelikter oryn alǵan joq. Qyzdarymyz 3:41.67 mınýtta márege jetti. Ekinshi oryndaǵy Iran qyzdary 10 sekýndqa qalyp qoıdy.Úzdik úshtikti Túrikmenstan túıindedi.

Jigitterden jalpy sany 6 komanda qatysty. Qazaqstan namysyn Andreı Sokolov, Sergeı Zaıkov, Dmıtrıı Koblov, Mıhaıl qorǵady. Chempıon atanǵan Katar quramasy márege 3:10.08 mınýtta jetse, Qazaqstan quramasynyń nátıjesi - 3:11.68 mınýt. Úshinshi orynǵa jergilikti Iran quramasy turaqtady - 3:11. 74.

Sondaı-aq 1500 metrge júgirýden Tatıana Neroznak kúmis júlde enshiledi. Tatıana 1 aqpan kúni 3000 metrge júgirýden bas júlde alǵan bolatyn. Búgin 1500 metrge júgirýden Shrı-Lanka sportshysyna ese jiberdi. Qostanaılyq atlet 1500 metrdi 4.28.20 mınýtta júgirip ótti. Úshinshi oryn Thı Oan Ngýenge (Vetnam) buıyrdy.

Osylaısha, Neroznak sporttyq karerasynda jabyq keshendegi Azııa chempıonatynyń barlyq júldesine ıe bolyp úlgerdi. Ol buǵan deıin 2014 jáne 2016 jyldary ótken Azııa chempıonatynda 800 metrge júgirýden qola júlde alǵan edi. 1 aqpanda 3000 metrde chempıon boldy. Búgin kúmis júlde buıyrdy.

Azııa chempıonatynan Qazaqstan quramasy jalpy 12 medal jeńip aldy. Onyń jeteýi altyn, tórteýi kúmis, bireýi qola.

Altyn

1. Tatıana Neroznak, 3000 metrge júgirý

2. Irına Ektova, úsh qarǵyp sekirý

3. Svetlana Golendova, 400 metrge júgirý

4. Áıgerim Shynazbekova, 60 metrge kedergiler arqyly júgirý

5. Anastasııa Ermakova,  syryqpen sekirý

6. Nıkıta Fılıppov, syryqpen sekirý

7.  4h400 metrlik estafeta, áıelder (Svetlana Golendova, Adelına Ahmetova, Vıktorııa Zıabkına, Elına Mıhına)+

Kúmis

1.Vıktorııa Zıabkına, 60 metrge júgirý

2. Elına Mıhına, 400 metrge júgirý

3. Tatıana  Neroznak, 1500 metrge júgirý

4. 4h400 metrlik estafeta, erler (Andreı Sokolov, Sergeı Zaıkov, Dmıtrıı Koblov, Mıhaıl Lıtvın)

Qola

1.      Nadejda Dýbovıtskaıa, syryqpen sekirý.

Jabyq keshendegi VIII Azııa chempıonaty (Tegeran). Jalpy komandalyqesep:

1. Qazaqstan - 7 altyn, 4 kúmis, 1 qola

2.  Iran - 5 altyn, 9 kúmis, 10 qola

3. Katar - 4 altyn, 3 kúmis, 2 qola

4. Qytaı - 3 altyn, 2 kúmis, 1 qola

5. Kýveıt - 3 altyn, 1 kúmis, 2 qola

6. Ózbekstan - 2 altyn, 1 kúmis, 0 qola

7. Vetnam - 1 altyn, 0 kúmis, 3 qola

8.  Shrı-Lanka - 1 altyn, 0 kúmis, 3 qola

9. Úndistan - 0 altyn, 4 kúmis, 2 qola

10. Qyrǵyzstan - 0 altyn, 1 kúmis, 0 qola

11. Taıbeı - 0 altyn, 1 kúmis, 0 qola

12. Túrikmenstan - 0 altyn, 0 kúmis, 2 qola

13. Japonııa - 0 altyn, 0 kúmis, 1 qola