Qazaqstan Jenevada biregeı «Beıbitshilik kilemin» tanystyrdy
ASTANA. KAZINFORM — Halyqaralyq sımpozıýmda qazaqstandyq qolóner men beıbitshilik ıdeıasy ushtastyryldy, dep habarlaıdy QR Syrtqy ister mınıstrliginiń baspasóz qyzmeti.
Dúnıejúzilik zııatkerlik menshik uıymynyń (DZMU) shtab-páterinde «Áıelder jáne zııatkerlik menshik» Halyqaralyq sımpozıýmy aıasynda Qazaqstan Respýblıkasynyń «Beıbitshilik joly» atty Beıbitshilik kilemi mádenı jobasynyń tusaýkeseri ótti.
Sımpozıým dúnıejúziniń túkpir-túkpirinen jınalǵan áıel-lıderlerdi, sarapshylar men jańashyldardy biriktirdi.
Yrza Tursynzada basqaratyn «Altyn Orda» Halyqaralyq qolónershiler akademııasy júzege asyryp jatqan jobany Qazaqstan Respýblıkasynyń DSU jáne basqa halyqaralyq ekonomıkalyq uıymdar janyndaǵy Turaqty ókili Qaırat Tórebaev tanystyrdy.
Sımpozıým ınnovatsııalar, zııatkerlik menshik jáne shyǵarmashylyq ekonomıka salasyndaǵy áıelderdiń rólin talqylaýǵa arnalǵan mańyzdy alańǵa aınaldy. Qatysýshylar áıel-ónertapqyshtar men kásipkerlerdi qoldaý, ınklıýzıvti saıasatty damytý jáne bilim men tehnologııalarǵa qoljetimdilikti keńeıtý máselelerine erekshe nazar aýdardy.
Beıbitshilik kileminiń tusaýkeseri erekshe qyzyǵýshylyq týdyrdy. Qaırat Tórebaev óz sózinde bul jaı ǵana óner týyndysy emes, mádenıetter men halyqtardyń birliginiń sımvoly ekenin atap ótti. Búginde kilemniń uzyndyǵy 70 metrden asyp, túkpir-túkpirdegi sheberlerdiń qatysýy arqasynda ósip keledi. Onyń ár fragmenti túrli halyqtardyń biregeı dástúrleri men tarıhyn beıneleıdi.
— «Beıbitshilik joly» atty Beıbitshilik kilemi — beıbitshiliktiń, ózara túsinistiktiń jáne mádenı áralýandyqtyń rámizi. Ol adamdardy óner arqyly biriktiredi», — dep atap ótti Turaqty ókil.
DZMU-nyń ınnovatsııalar damytýǵa jáne áıelderdi qoldaýǵa qosqan úlesin moıyndaý belgisi retinde kilemniń jańa fragmentteriniń biri osy uıymǵa arnalatyn bolady.
Jobanyń tusaýkeseri sımpozıým kún tártibin organıkalyq tolyqtyryp, zamanaýı bilim ekonomıkasyn qalyptastyrýdaǵy áıelderdiń mańyzdy rólin aıqyndady. Zııatkerlik menshik salasyndaǵy áıelderdi qoldaý turaqty damý men teń múmkindikterdiń mańyzdy faktory retinde qarastyrylady.
Qazaqstan zııatkerlik menshik, mádenıet jáne shyǵarmashylyq ındýstrııalar salasyndaǵy halyqaralyq yntymaqtastyqty damytýǵa berilgendigin rastady.
Budan buryn Jenevadaǵy Ulttar saraıynda «Qazaqstan» zaly ashylǵanyn jazǵanbyz.
