Qazaqstan jemqorlyqqa qarsy ymyrasyz kúresti dáıekti túrde júrgizip keledi – Prezıdent
Halyqaralyq sybaılas jemqorlyqqa qarsy akademııa (HSQA) men Qazaqstan Respýblıkasy búgin álemniń túkpir-túkpirinen Nur-Sultanǵa kelgen 70-ten astam delegatty kútip aldy. 46-dan astam ulttyq jáne ınstıtýtsıonaldyq uıymdardyń ókilderi jalpy maqsattar men HSQA strategııasyn talqylaý úshin úshkúndik is-sharaǵa qatysady.
Kún tártibinde akademııa úshin qarajat jınaý, onyń aǵymdaǵy jumys baǵdarlamasyn iske asyrý jáne akademııanyń jańa strategııasyn ázirleý máseleleri qaralady. Sonymen qatar, HSQA-nyń sybaılas jemqorlyqqa qarsy keıbir baǵdarlamalary talqylanatyn paneldik pikirtalas ótedi.
Sessııany Grýzııanyń Qazaqstandaǵy Elshisi Zýrab Abashıdze ashty. Ol Assambleıa tóraǵasy qyzmetinen ketip bara jatqan Gocha Lordkıpanıdzeniń atynan sóz sóıledi.
«Halyqaralyq sybaılas jemqorlyqqa qarsy akademııaǵa qyzmet etýge jáne sybaılas jemqorlyqqa qarsy is-qımyl boıynsha jalpy iske óz úlesimdi qosqanyma qýanamyn. Men bul sessııa uıymdastyrý men onyń mańyzdy mıssııasyn odan ári nyǵaıta túsedi degen úmittenemin», – delingen Lordkıpanıdzeniń sózinde.
Assambleıa qatysýshylaryn Qazaqstan Respýblıkasynyń Memlekettik hatshysy Qyrymbek Kósherbaev QR Prezıdenti atynan quttyqtady. Óziniń quttyqtaý sózinde Prezıdent Qazaqstannyń júıeli túrde moıyndalǵan halyqaralyq standarttardyń negizinde sybaılas jemqorlyqpen ymyrasyz kúres júrgizip kele jatqanyn aıtyp ótken.
«2008 jyly bizdiń elimiz BUU-nyń Sybaılas jemqorlyqqa qarsy konventsııasyn ratıfıkatsııalady. Sybaılas jemqorlyqqa qarsy kúres jónindegi Ystanbul is-qımyl josparynyń usynymdaryn oryndaý bóliginde eleýli progreske qol jetkizildi. Osy jyldyń 27 tamyzynda Qazaqstannyń Eýropa Keńesiniń jemqorlyqqa qarsy memleketter tobyna qosylýyn maquldaý týraly Qazaqstan Prezıdentiniń Jarlyǵyna qol qoıyldy. Osylaısha biz álemdik qoǵamdastyqqa elimizdiń eń joǵary Halyqaralyq sybaılas jemqorlyqqa qarsy standarttarǵa adaldyǵyn taǵy da pash etemiz», - delingen quttyqtaý hatta.
Qabyldaýshy eldiń atynan sóılegen sózinde QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev elimizdiń jemqorlyqqa qarsy bastamalarynda qol jetkizgen jetistigin atap ótti.
«Qazirgi ýaqytta Qazaqstanda sybaılas jemqorlyq deńgeıin túbegeıli azaıtýǵa baǵyttalǵan reformalardyń jańa paketin daıyndaý boıynsha júıeli jumys júrgizilýde», – dep atap ótti Sybaılas jemqorlyqqa qarsy vedomstvo basshysy.
Qazaqstan úshin birinshi kezektegi basymdyqtardyń biri - turmystyq sybaılas jemqorlyqty joıý. Bul maqsatta birinshi kezekte, memlekettik qyzmetterdi barynsha tsıfrlandyrý kózdelgen. Búgingi tańda Qazaqstan BUU-nyń tıisti reıtıngisinde elektrondyq úkimettiń damý deńgeıi óte joǵary elder tobyna kiredi.
Assambleıa sessııasy 4 qazanda aıaqtalady.
