Qazaqstan jemqorlyqqa qarsy kúres reıtınginde joǵarylady
ASTANA. QazAqparat - Qazaqstan halyqaralyq reıtıngterde sybaılas jemqorlyqqa qarsy is-qımyl boıynsha óziniń kórsetkishterin jaqsartýda. Bul týraly QazAqparat QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń baspasóz qyzmetine silteme jasap habarlaıdy.
Jýyrda sybaılas jemqorlyqqa qarsy kúreste progresti baǵalaıtyn 9 reıtıngtik agenttikterdiń biri Álemdik sot tóreligi jobasy óziniń esebin jarııalady.
Sońǵy jyldary Qazaqstan birinshi kezekte sybaılas jemqorlyqtyń paıda bolýynyń sebepteri men jaǵdaılaryn joıýǵa baǵyttalǵan qazirgi zamanǵy sybaılas jemqorlyqqa qarsy saıasatty ustanatynyn atap ótken jón.
Aktsenttiń jazalaýdan aldyn alý sharalaryna yǵysýy halyqaralyq reıtıngtik agenttikterdiń oń baǵasyn aldy.
Álemdik sot tóreligi jobasynyń baǵasy boıynsha Qazaqstan 0,51 upaı jınady jáne 2016 jylǵy nátıjelermen (73) salystyrǵanda
9 pozıtsııaǵa kóterilip, álemniń 113 eliniń arasynda 64-orynǵa ıe boldy.
Mundaı nátıjege qol jetkizýdiń negizgi faktorlarynyń biri -
«Sybaılas jemqorlyqtyń bolmaýy» ındıkatory boıynsha kórsetkishtiń 2016 jylmen (0,43) salystyrǵanda 0,02 upaıǵa ósýi (0,45).
Uqsas jaǵymdy ózgerister Halyqaralyq basqarýdy damytý ınstıtýtynyń Jyl saıynǵy jahandyq básekege qabilettiliktiń reıtınginde de atap ótildi, oǵan sáıkes 2017 jyly bizdiń elimiz reıtıngte 32-orynǵa ıe bolyp, 2016 jylmen (47) salystyrǵanda kórsetkishti 15 pozıtsııaǵa jaqsartty.
Atalǵan reıtıngte jeke ındıkator retinde «Paraqorlyq jáne sybaılas jemqorlyq» belgilengen, ol boıynsha Qazaqstanda progress 1,5 ese baıqalýda (2017 jyly - 4,26 upaı, 2016 jyly - 2,52).
Ázirge bul tek eki reıtıngtik agenttiktiń málimetteri. Qazaqstannyń sybaılas jemqorlyqqa qarsy is-qımyl salasyndaǵy bastamalary Transparensı Interneshnldiń Sybaılas jemqorlyqty sezgishtigi ındeksine jalpy qalaı áser etetinin biz bir aıdyń ishinde bilemiz.
Aıta keteıik, 21 aqpanda Transparensı Interneshnldiń Sybaılas jemqorlyqty sezgishtigi ındeksi jarııalanady.
