Qazaqstan jelilik daıyndyq ındeksi boıynsha 139 eldiń arasynda 39-shy orynda
ASTANA. QazAqparat - 2016 jylǵy 6 shildede Dúnıejúzilik ekonomıkalyq forým álemniń túrli elderindegi jelilik daıyndyq ındeksin anyqtaý boıynsha zertteý nátıjesi kórsetilgen jyl saıynǵy «Aqparattyq tehnologııalardy damytý boıynsha jahandyq esepti» jarııalady, dep habarlady QR Aqparat jáne kommýnıkatsııalar mınıstrliginiń baspasóz qyzmetinen.
«Ótken jylmen salystyrǵanda kósh basyndaǵy úshtik - Sıngapýr, Fınlıandııa, Shvetsııa ózgergen joq. Qazaqstan TMD elderi arasynda kóshbasshy orynǵa turaqtap, óńirlik reıtıngti bastap tur»,- delingen habarlamada.
Bıyl álem elderi kórsetkishterdiń tórt sanaty boıynsha baǵalandy:
- Tehnologııalardy qurý men paıdalaný úshin jalpy orta;
- AKT-ınfraqurylymdardyń qoljetimdiligi turǵysynan jelilik ázirlik;
- Jańa tehnologııalardy úkimettiń, jeke sektordyń jáne jeke tulǵalardyń paıdalanýy;
- Jańa tehnologııalardyń ekonomıkalyq jáne áleýmettik yqpaly.
Atap ótý kerek, «AKT salasyndaǵy zańnamany damytý» kórsetkishi boıynsha Qazaqstan 2015 jylǵy kórsetkishten (48 oryn) 10 orynǵa joǵarylap, 2016 jyly 38 orynǵa turaqtady.
«Mektepterde ınternetke qoljetimdilik» kórsetkishi boıynsha elimiz bir jyl ishinde 15 deńgeıge kóterilip, 41-shi orynǵa jetti.
«Bıznesti ashý úshin qajetti ýaqyt» jáne «Bıznesti bastaýǵa qajetti protsedýralar sany» kórsetkishteri boıynsha Qazaqstan álem elderiniń alǵashqy otyzdyǵyna enedi. Bul rette biz bir jyl ishinde kórsetkishterimizdi eki esege arttyryp, qazirgi ýaqytta sáıkesinshe 26-shy jáne 22 oryndarǵa jettik.
Eske sala keteıik, Jelilik daıyndyq ındeksi - álem elderinde aqparattyq qoǵamdy damytý jónindegi jyl saıynǵy baıandamalar serııasy sheńberinde 2002 jyldan beri Dúnıejúzilik ekonomıkalyq forým men INSEAD halyqaralyq bıznes mektebi usynatyn AKT-ni damytýdyń keshendi kórsetkishteri. 2013 jyly jobaǵa Kornelsk ýnıversıteti janyndaǵy Semıýel Kertıs Djonson atyndaǵy Joǵary basqarý mektebi (Samuel Curtis Johnson Graduate School of Management) qosyldy. Túrli elderdegi aqparattyq qoǵamnyń damý deńgeıin kórsetetin salystyrmaly reıtıngterdi qurý úshin taldaý quraly retinde paıdalanylady.
