Qazaqstan jelilik damý jáne uıaly baılanys tarıfi ındeksi jóninen TOP-50 eldiń qataryna endi
ASTANA. 11 sáýir. QazAqparat - Dúnıejúzilik Ekonomıkalyq Forýmnyń (DEF) ǵalamdyq esebinde jarııalanǵan málimetterge sáıkes Qazaqstan jelilik daıyndyq ındeksi boıynsha 2012 jylǵy eseppen salystyrǵanda 12 satyǵa joǵarylap, tizimdegi 144 eldiń ishinen 43-shi orynǵa ıe boldy. Osylaısha, Vengrııa (44-shi oryn) men Chehııa (42-shi oryn) elderiniń arasyna ornalasty jáne TMD elderi ishinde eń joǵary kórsetkishke ıe boldy.
Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
Reseı atalǵan kórsetkish boıynsha 54 orynda tur. DEF reıtıngisinde Fınlıandııa 1-shi orynǵa kóterilse, Sıngapýr óziniń 2-shi ornyn saqtap qaldy, al Shvetsııa 3-orynǵa tómendedi.
Jelilik daıyndyq ındeksi eldegi aqparattyq-kommýnıkatsııalyq tehnologııalardyń (AKT) damý deńgeıi boıynsha anyqtalatyndyǵyn jáne birneshe kórsetkishten quralatyndyǵyn atap ótken jón. Bul kórsetkishterdiń kópshiliginiń osy jyly aıtarlyqtaı óskeni baıqalady.
Mysaly, uıaly baılanys abonentteriniń sany jóninen Qazaqstan 11 orynǵa kóterildi (elimizdegi 100 turǵynǵa 156 mobıldik nómirden kelip otyr, al kóshbasynda turǵan Gonkongte ár 100 turǵynǵa 215 telefon nómirinen keledi). Internet jelisin paıdalanýshylar sany jóninen Qazaqstan 62-shi orynǵa kóterilse, uıaly baılanys qyzmetiniń arzandyǵy jóninen 42-shi orynǵa taban tiredi. Al, keńjolaqty mobıldi ınternet abonentteriniń sany jóninen 29-shy satyǵa kóterildi.
Ótken jyly jarııalanǵan esep kórsetkishterimen salystyrar bolsaq, Qazaqstan joǵaryda atalǵan kórsetkishter boıynsha 40-nshy, 78-nshi, 64-nshi jáne 113-nshi satylardan kóringen bolatyn.
