Qazaqstan jel energııasyna úmit artady: 2030 jylǵa deıin 3,1 GVt josparlanǵan

ASTANA.KAZINFORM — Jel energetıkasy — Qazaqstandaǵy jańartylatyn energııa kózderi (JEK) salasyndaǵy ınvestorlar úshin eń tartymdy baǵyt bolyp otyr. Bul eldiń joǵary jel áleýetine baılanysty: jyl boıǵy ortasha jel jyldamdyǵy elektr energııasyn tıimdi óndirýge múmkindik beredi. Bul týraly Energetıka mınıstrligi málim etti. 

Búgingi tańda jel elektr stantsııalary (JES) JEK nysandarynyń jalpy qýatynda eń úlken úlesti alady — shamamen 3 GVt ishinen 1,5 GVt astamy jel energetıkasyna tıesili.

— Qazaqstan Respýblıkasy Energetıka mınıstrligi 2030 jylǵa deıin Biryńǵaı satyp alýshymen jasalǵan kelisim sharttardy jáne aldaǵy aýktsıondyq saýda-sattyqty eskere otyryp, jalpy qýaty shamamen 3,1 GVt bolatyn jańa JES salýdy josparlap otyr. Bul jobalardyń basym bóligi Qaraǵandy, Aqtóbe jáne Qostanaı oblystarynda júzege asyrylady, - delingen habarlamada.

Aıta keteıik, Qazaqstannyń energııa teńgerimindegi JEK úlesi 6%-dan asty.