Qazaqstan jekeshelendirýde EYDU kórsetkishine jetedi
ASTANA. QazAqparat - Búgin otandyq telearnalardan kórsetilgen respýblıkalyq BAQ ókilderine suhbaty barysynda QR Prezıdenti Nursultan Nazarbaev qazirgi jekeshelendirýdiń negizgi maqsaty jaıynda aıtyp berdi, dep habarlaıdy QazAqparat.
«Biz reformalardy iske asyryp, naryqtyq ekonomıkanyń jolyna tústik. Birinshi jappaı jekeshelendirýdi 90-shy jyldary júzege asyrdyq. Qazirgi kezde osyndaı ekinshi jekeshelendirýdi júrgizip jatyrmyz. Búginde memlekettiń basqarýynda taǵy da 7 myń kásiporyn qalyp otyr. Bizdiń maqsat memlekettiń basqarýyna 15 paıyzyn qaldyrýǵa negizdelgen. Osyndaı kórsetkishter Ekonomıkalyq yntymaqtastyq jáne damý uıymynda qalyptasqan. Qazirgi kezde memleketke 60 paıyzdan astamy tıesili. Biz damyǵan 30 eldiń qataryna enýge nıettimiz. Bul jekeshelendirý reformalardyń qajettiligin bildiredi»,-dedi Prezıdent.
Osy oraıda Memleket basshysy jekeshelendirýge jatatyn nysandar jeke kompanııalarǵa, shaǵyn jáne orta bızneske ótetinin eske salyp ótti.
Aıta keteıik, otandyq telearnalardan Qazaqstan Prezıdenti Nursultan Nazarbaevtyń suhbatynyń tolyq nusqasy kórsetildi. Elbasy otandyq jáne halyqaralyq BAQ ókilderimen kezdesý ótkizdi. Jıynǵa qatysýshylar «Qazaqstannyń úshinshi jańǵyrýy: jahandyq básekege qabilettilik» atty Joldaýdy iske asyrý aıasynda el ekonomıkasyn transformatsııalaý úderisiniń birqatar aspektilerin, sybaılas jemqorlyqqa qarsy kúres máselelerin, qazirgi saıası jańǵyrý kezeńiniń erekshelikterin, BUU Qaýipsizdik keńesiniń turaqty emes múshesi retindegi Qazaqstannyń syrtqy saıası basymdyqtaryn, sondaı-aq basqa da mańyzdy jaıttardy talqylady. Kezdesýge «Qazaqstan», «Habar», «MIR» telearnalarynyń, «Aıqyn» gazetiniń, «Esquire» jýrnalynyń, «QazAqparat» aqparat agenttiginiń jýrnalısteri qatysty.
