Qazaqstan jekemenshik túrme qurylysynan nege bas tartty
ASTANA. QazAqparat - QR Іshki ister mınıstri Qalmuhanbet Qasymov qylmystyq-atqarý júıesinde áli kúnge deıin burynǵy keńestik júıeniń sıpaty saqtalǵanyn aıtty, dep habarlaıdy QazAqparat.
«Moıyndaý kerek, bizdiń qylmystyq-atqarý júıemiz áli kúnge deıin kóbinese burynǵy keńestik júıeniń belgilerin saqtap keledi jáne halyqaralyq standarttardan alystaý. Sondyqtan da elimizde qylmystyq-atqarý saıasaty men jazany oryndaýdy uıymdastyrý tetikteri jetildirýde. Halyqaralyq tájirıbeni eskere otyryp, qylmystyq-atqarý júıesin damytýdyń negizgi tujyrymdamalyq baǵyty ázirlendi. Birinshi kezekte bas bostandyǵynan aıyrylǵandardy qamaýda ustaýdyń ujymdyq tártibinen jeke kameraǵa ornalastyrýǵa aýysý eskerilgen. Ol úshin qazirgi zamanǵy jańa mekemelerdi salý kerek. Árıne, bul ońaı sharýy emes, sebebi osy júıeniń 10 jyl boıy Ádilet mınıstrliginiń qaraýynda bolǵan kezinde birde-bir kolonııa men tergeý ızolıatory salynbaǵan», - dedi mınıstr Parlament Májilisinde bas bostandyǵynan aıyrý oryndarynan bosatylǵan jáne probatsııa qyzmetinde esepte turǵan azamattardy áleýmettik ońaltýdyń 2017-2019 jyldarǵa arnalǵan keshendi strategııasyn iske asyrý taqyrybyndaǵy Úkimet saǵatynda.
Sonymen qatar vedomstvo basshysy Qazaqstanda jekemenshik túrmelerdiń qurylysy ıdeıasynan nelikten bas tartylǵandyǵyn aıtty.
«Memlekettik-jekeshelik seriktestik tetigin paıdalaný arqyly jańa kolonııany salý nusqasyn Ulttyq ekonomıka mınıstrligimen birlese qarastyrdyq. Alaıda joba kontsessııa kestesi boıynsha jeke kapıtaldyń qatysýy jaǵdaıynda saraptamadan óte almady, óıtkeni bul joba aıtarlyqtaı qymbatqa túsip, el bıýdjetine aýyrtpalyq túsiretini anyqtaldy», - dep túsindirdi mınıstr.
Q. Qasymovtyń aıtýynsha, qazirgi kezde Ulttyq ekonomıka mınıstrligimen jáne Qazaqstannyń memlekettik-jekeshelik seriktestik ortalyǵymen birlese qoldanystaǵy túzetý mekemeleriniń aýmaǵyndaǵy turǵyn korpýstaryn qaıta qurý nemese balamaly negizde olardyń ornyna jeke kameraly jańa korpýstardy salý qarastyrylýda. Bul usynystar Úkimet tarapynan qoldaýǵa ıe boldy.
