Qazaqstan jeke derekterdi qorǵaý salasyndaǵy halyqaralyq komıtetke baqylaýshy retinde qosyldy
ASTANA. KAZINFORM - Qazaqstan Respýblıkasyna Jeke derekterdi avtomattandyrylǵan óńdeý kezinde jeke tulǵalardy qorǵaý týraly Eýropa Keńesiniń № 108 konventsııasy komıteti janyndaǵy baqylaýshy mártebesi resmı túrde berildi, dep habarlaıdy QR Jasandy ıntellekt jáne tsıfrlyq damý mınıstrliginiń baspasóz qyzmeti.
Bul sheshim Komıtettiń Strasbýrgte ótken 50-shi jalpy otyrysynyń qorytyndysy boıynsha qabyldandy.
Іs-sharaǵa QR Jasandy ıntellekt jáne tsıfrlyq damý vıtse-mınıstri Dosjan Musalıev qatysty.
Bul alań tsıfrlandyrý jaǵdaıynda jeke derekterdi qorǵaý jáne qupııalylyqty qamtamasyz etý tásilderin qalyptastyratyn negizgi halyqaralyq ınstıtýt bolyp tabylatynyn atap ótken jón.
-Baqylaýshy mártebesin alý - Qazaqstan úshin mańyzdy qadam. Bul bizge halyqaralyq seriktestermen tájirıbe almasýǵa jáne ozyq álemdik tájirıbeler negizinde jeke derekterdi qorǵaýdyń ulttyq júıesin jetildirýge múmkindik beredi, - dep atap ótti Dosjan Musalıev.
Sessııa aıasynda Jasandy ıntellekt jáne tsıfrlyq damý mınıstrliginiń vıtse-mınıstri №108 konventsııa komıtetiniń tóraǵasy Beatrıs de Ankorenamen jáne Eýropa Keńesiniń Bas hatshysy Alen Bersemen kezdesýler ótkizdi. Taraptar derekterdi qorǵaý jáne tsıfrlyq damý salasyndaǵy yntymaqtastyqtyń keleshegin talqylady.
Bul oraıda, jeke ómirge qol suǵylmaýshylyq pen jeke derekterdi qorǵaý quqyǵy Qazaqstan Respýblıkasy Konstıtýtsııasynyń 21-babynda bekitilgenin qosa ketken jón.
-Jasandy ıntellekt jáne tsıfrlyq damý mınıstrligi tsıfrlyq ortada azamattardyń derekteriniń qaýipsizdigin qamtamasyz etý úshin zańnamalyq mehanızmder men quraldardy júıeli túrde damytyp keledi, al jańa baqylaýshy mártebesi Qazaqstanǵa halyqaralyq bastamalardy talqylaýǵa belsendi qatysýǵa, Konventsııaǵa múshe memleketterdiń tájirıbesin qabyldaýǵa jáne ulttyq retteýge zamanaýı standarttardy ıntegratsııalaýǵa múmkindik beredi,-delingen habarlamada.
Aıta keteıik, Eýropa Keńesiniń № 108 konventsııasy - jeke derekterdi qorǵaý salasyndaǵy qupııalylyqtyń jahandyq standarttaryn aıqyndaıtyn alǵashqy jáne jalǵyz kópjaqty mindetteýshi kelisim.
Konventsııa komıteti tsıfrlyq tehnologııalar dáýirinde osy normalardy ózektendirýge jaýapty, halyqaralyq yntymaqtastyqty úılestiredi jáne qatysýshy elderge ulttyq zańnamany kıberqaýipsizdiktiń zamanaýı syn-qaterlerine beıimdeýge kómektesedi.
Osyǵan deıin elde memlekettik basqarýdyń jańa tsıfrlyq modeli engiziletini týraly jazdyq.
