Qazaqstan JEK sektoryn damytý arqyly 3,2 myń jumys ornyn qurady

NUR-SULTAN. QazAqparat – Qazaqstan jańartylatyn energııa kózderi sektoryn damytý arqyly 3,2 myń jańa jumys ornyn qurady. Bul týraly QR Energetıka mınıstri Bolat Aqsholaqov aıtty, dep habarlaıdy QazAqparat tilshisi.

«Qazaqstan Respýblıkasy álemdik qoǵamdastyqpen qatar eldegi jańartylatyn energııa kózderi sektoryn damytýǵa zor kóńil bóledi. Máselen, baǵdarlama aıasynda energetıkalyq keshendi jańǵyrtý kózdelgen. Bul 2025 jylǵa deıin 3,2 myń jumys ornyn qura otyryp, jańartylatyn energııa kózderi boıynsha 40 jobany iske qosýdy kózdeıdi», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń dereginshe, bıyl 900-den astam jumys ornyn ashýǵa múmkindik beretin 11 jańartylatyn energııa kózderi jobasyn iske qosý josparlanyp otyr.

«Búgingi tańda 5 nysan iske qosyldy. Onyń ishinde 3 kún elektr stansasy jáne 330 jumys orny qurylǵan 2 jel elektr stansasy bar. Jyl sońyna deıin qosymsha 577 jumys orny ashylatyn bolady», - dedi Bolat Aqsholaqov.