Qazaqstan Jazǵy Olımpıadada 13 medal jeńip alýǵa úmitti
ASTANA. 10 mamyr. QazAqparat - Qazaqstan XXX Jazǵy London Olımpıadasynda túrli dárejedegi 13 medal jeńip alýdy josparlaýda.
Bul týraly búgin ótken baspasóz máslıhatynda QR Sport jáne dene shynyqtyrý isteri agenttiginiń tóraǵasy Talǵat Ermegııaev málim etti.
«Bizdiń London Olımpıadasynda biraz úmitterimiz bar. Jalpy jospar - 13 medal. Onyń ishinde - 3 altyn, ary qaraı enshimizde kúmis nemese qola medaldar bolady ma, ol sport túrine baılanysty. Biraq bizdiń sportshylarymyzdyń sońǵy ótken halyqaralyq birinshilikterdegi daıyndyǵyn qaraı otyryp, olarǵa joǵary tapsyrma da, talap ta qoıyp otyrmyz», - deıdi T. Ermegııaev.
Agenttik tóraǵasy atap ótkenindeı, ol eń birinshi aýyr atletshilerimizge, balýandarymyzǵa jáne boksshylarymyzǵa úlken úmit artady. Sonymen qatar álemdik reıtıngte 2-orynda turǵan jeńil atletshi qyz Olga Rypakova altyn alýy tıis dep otyr.
