Qazaqstanda jazda birneshe halyqaralyq sport jarysy ótedi
ASTANA. KAZINFORM – Týrızm jáne sport mınıstrliginde jaz aılarynda Qazaqstanda ótetin halyqaralyq sport jarystaryna daıyndyq máseleleri talqylandy.
Jumys keńesinde Astana, Túrkistan, Shymkent jáne Aqtaý qalalarynda uıymdastyrylatyn halyqaralyq týrnırlerge daıyndyq barysy qaraldy.
Kezdesý barysynda sportshylar men kórermenderdiń qaýipsizdigin qamtamasyz etý, sport ınfraqurylymynyń daıyndyǵy, logıstıka, medıtsınalyq qyzmet kórsetý, sheteldik delegatsııalardy ornalastyrý jáne ortalyq pen jergilikti atqarýshy organdar arasyndaǵy ózara is-qımyl máselelerine erekshe nazar aýdaryldy.
Qatysýshylar elordada ótetin bochchadan Álem kýbogine daıyndyqty talqylady. Atalǵan jarysqa álemniń 25 elinen sportshylar qatysady.
Sonymen qatar keńeste 16 elden shamamen 350 sportshy qatysatyn baıdarka men kanoede eskek esýden Azııa chempıonaty, 1600-ge jýyq sportshy baq synaıtyn taekvondodan (WT) halyqaralyq týrnırler, 15 elden 250-ge jýyq sportshy jınalatyn jeńil atletıkadan XXXV Ǵusman Qosanov memorıaly, 50 elden 500-ge jýyq sportshy qatysatyn kýrashtan álem chempıonaty jáne 700 sportshy baq synaıtyn WKF karateden Ortalyq Azııa chempıonatyna daıyndyq máseleleri qaraldy.
Týrızm jáne sport vıtse-mınıstri Serik Jarasbaev halyqaralyq jarystardy joǵary deńgeıde ótkizýdiń mańyzyn atap ótti.
– Mundaı iri sporttyq is-sharalar Qazaqstannyń halyqaralyq sport arenasyndaǵy bedelin nyǵaıtýǵa, sport ınfraqurylymyn damytýǵa jáne buqaralyq sportty keńinen nasıhattaýǵa yqpal etedi, – dedi ol.
Kezdesý sońynda jaýapty memlekettik organdarǵa, federatsııalarǵa jáne jarys uıymdastyrýshylaryna halyqaralyq týrnırlerge sapaly ári ýaqtyly daıyndalý jóninde naqty tapsyrmalar berildi.
Aıta keteıik, buǵan deıin qazaqstandyq boksshy qyzdar Azııa chempıonatynyń fınalyna shyqqany málim boldy.
