Qazaqstan jaz sońyna deıin qant eksportyna tyıym salady
ASTANA. KAZINFORM - Qazaqstan jaz sońyna deıin qant eksportyna tyıym salady. Bul aldaǵy jazǵy maýsymda qazaqstandyqtardyń qantqa degen suranysyn tolyq qamtamasyz etýge múmkindik beredi.
Búgin, 6 mamyrda vıtse-premer Serik Jumanǵarınniń tóraǵalyǵymen ótken Syrtqy saýda saıasaty jáne halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń otyrysynda qant qyzylshasynyń jańa ónimi jınalǵanǵa deıin ishki naryqty qantpen qamtamasyz etý máseleleri qaraldy. Qazirgi ýaqytta qoımalardaǵy qant qorynyń jáne Qazaqstanǵa ımport kóleminiń teńgerimi shamamen 256 myń tonna, bul eldiń jyldyq qajettiliginiń jartysy (500-550 myń tonna).
«Búginde qoımalardaǵy qant pen shıki quraq qory 136 myń tonna. 2024 jyldyń 31 tamyzyna deıin kvotamen reseılik qanttyń 120 myń tonna kólemindegi ımportyn qosqanda, bul shamamen 256 myń tonnaǵa deıin jetedi. Sonymen qatar Qazaqstanda 2024 jyldyń sońyna deıin óńdeýge arnalǵan 300 myń tonna shıki quraqty bajsyz ákelýge kvota bar. Orta eseppen aılyq tutyný jazda 46 myń tonna, suranys 60 myń tonnaǵa jetedi. Qoldanystaǵy qant qory jańa ónimge deıin qantqa degen suranysty óteýge jetkilikti», - dedi Aýyl sharýashylyǵy vıtse-mınıstri Erbol Tasjúrekov.
Jaqyn arada qazaqstandyq tarap reseılik áriptesterimen qant jetkizý kvotasyn jyl sońyna deıin taǵy da 100 myń tonnaǵa ulǵaıtý boıynsha kelissózder júrgizýdi josparlap otyr. Sonymen qatar qazaqstandyqtardy qantpen úzdiksiz qamtamasyz etý úshin vedomstvoaralyq komıssııamen 2024 jylǵy 31 tamyzǵa deıin Qazaqstannan úshinshi elderge, onyń ishinde halyqaralyq tranzıtti qospaǵanda, EAEO-ǵa qatysýshy elderge qant eksportyna ýaqytsha tyıym salýdy engizý týraly ujymdyq sheshim qabyldandy.
