Qazaqstan jasymyq eksporty boıynsha álemde úzdik bestikke kirmek

ASTANA. QazAqparat - Qazaqstan jasymyq eksporty boıynsha álemde úzdik bestikke kirmek. Bul týraly búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen QR Aýyl sharýashylyǵy birinshi vıtse-mınıstri Qaırat Aıtýǵanov aıtty, dep habarlaıdy QazAqparat.

Onyń aıtýynsha, búgingi tańda maıly jáne burshaq daqyldaryna suranys artyp keledi.

«Maıly daqyldardy satýdaǵy dástúrli naryq Eýropa bolyp otyr. Aıta keterligi, Qazaqstan maıly jáne burshaq daqyldardyń eksportyn arttyrýda. Aǵymdaǵy jyly jasymyq boıynsha da jaqsy nátıje bar. Ótken jyly biz jasymyq eksporty boıynsha álemde 6-shy orynda bolsaq, bıyl 4-5-shi orynǵa kóterilemiz dep josparlaýdamyz», - dedi birinshi vıtse-mınıstr.

Sonymen qatar ol Qazaqstan astyǵynyń dástúrli naryǵy Ortalyq Azııa elderi men Aýǵanstan bolyp qala beretindigin basa aıtty.

«Aǵymdaǵy  jyly da osy dástúrli naryqtar qala beredi. Degenmen, biz buǵan deıin eksportqa shyǵarmaǵan daqyldar boıynsha da jańa naryqtarǵa shyǵýdamyz. Joǵaryda atap ótken jasymyqtan bólek noqat, asburshaqty eksportqa shyǵarmaqpyz. Búginde bul burshaq daqyldary suranys óte joǵary», - dedi ol.