Qazaqstan «jasyl» ekonomıkaǵa nelikten kóshe almaı otyr
ASTANA. QazAqparat - «Qazaqstannyń «jasyl» qarjy júıesi» jobasyn ázirlegen mamandar eldiń «jasyl» ekonomıkaǵa kóshý áleýetine taldaý jáne baǵalaý júrgizdi, dep habarlaıdy QazAqparat tilshisi.
Taldaý barysynda jeke jáne memlekettik qarjy ınstıtýttaryna, qarjy naryǵyna jáne zańnamalyq bazaǵa zertteý júrgizilgen.
«Birinshiden, saıasat pen áleýettiń, ásirese qaldyqtardy satýda birqatar olqylyqtardyń bar ekenin anyqtadyq. Esepterdi daıyndaýda shekteýler bar, ıaǵnı qarjylyq kedergiler, uzaqmerzimdi kapıtaldyń tapshylyǵy sezilip otyr. Ádette, barlyǵy uzaqmerzimdi ınfraqurylymdyq jobalar úshin qoljetimdi bolady. Eń uzaq merzim - 7 jyl, al 7 jyl ınfraqurylymdyq jobalar úshin jetkiliksiz. Mindettemeler men aktıvter arasynda teńgerim joq. Sektordyń ózi, JІÓ turǵysynan aıtar bolsaq, ózge salalardan qalys keledi. Naryqtaǵy kedergiler, ınfraqurylymdyq qyzmetterge degen tómen tarıf, mýnıtsıpaldy qyzmetterge qysqamerzimdi kelisimsharttar, qorshaǵan ortany qorǵaý týraly aqparattyń bolmaýy - munyń barlyǵy bizdegi jetilmegen «jasyl» ekonomıka júıesin aıǵaqtaıdy», - dedi jumys tobynyń jetekshisi Katýllýs Helmer Astanada ótken konferentsııada.
Onyń aıtýynsha, qazirgi qabyldanyp jatqan sharalar jetkiliksiz. Jańartylatyn energııa salasyna salynǵan keı ınvestıtsııalar júzege asyrylǵan, biraq aktıvterdi basqarýda ınvestıtsııalyq mandat joq. Bankter qansha qalasa da, «jasyl» ekonomıkany qarjylandyrmaıdy. Oǵan qosa, ázirlengen daıyn «jasyl» ónimder de joq.
Osyǵan baılanysty jumys toby Qazaqstannyń «jasyl» qarjylyq júıesin damytý tujyrymdamasyna 7 negizgi usynymdy ázirledi.
Sarapshylardyń aıtýynsha, eń aldymen, Qazaqstanǵa úılestirý úshin myqty basshylyq qajet. Jaqynda ǵana qurylǵan «Astana» halyqaralyq qarjy ortalyǵyn kómirtek naryǵy men «jasyl» qarjylandyrýlar úshin Ulttyq chempıon retinde bekitý qajet. Sonymen birge, «jasyl» ekonomıkaǵa kóshý boıynsha qarjy júıesin jol kartasyna biriktirý qajet. Jol kartasy, óz kezeginde, memleket tarapynan resmı qoldaýǵa ıe bolýy tıis.
