Qazaqstan «jasyl» ekonomıkada Fınlıandııanyń tájirıbesin engizedi
ASTANA. QazAqparat - Qazaqstan «jasyl» ekonomıkany damytýda Avstrııa, Fınlıandııa jáne Latvııanyń tájirıbelerin paıdalanady. Búgin «Jasyl kópir» seriktestik baǵdarlamasy» halyqaralyq forýmy barysyndaǵy baspasóz máslıhatynda QR Energetıka mınıstri Qanat Bozymbaev osylaı málim etti, dep habarlaıdy QazAqparat.
Forým barysynda «jasyl» tehnologııalar salasynda Avstrııadaǵy Tehnologııalar ınstıtýtymen, KaukoInternational Group atty fın kompanııasymen yntymaqtastyq týraly memorandýmǵa qol qoıyldy.
«Atalǵan eki uıymmen memorandýmǵa ne úshin qol qoıyldy degen suraqqa jaýap beretin bolsaq, máselen, «Kaýkoınterneshnl» - ol fın kompanııasy ekenin belgili. Al Fınlıandııa álemdegi eń «jasyl» elderdiń biri. Olarda qaldyqtardy óńdeý deńgeıi 98 paıyzdy qurap otyr. Qazaqstandaǵy deńgeıge toqtalsaq, ónerkásiptik qaldyqtar boıynsha 26, turmystyq qaldyqtar turǵysynda 2-3 paıyzdy qamtýda. Sondyqtan osynda birneshe apta buryn Fınlıandııa prezıdenti saparlaǵan kezinde, ıaǵnı Fınlıandııa pavılonyn ashý barysynda memleket basshylary elimizde atalǵan memlekettiń tájirıbesi engiziletindigine ýaǵdalasty»,-dedi Bozymbaev.
Bul baǵytta ol úkimetaralyq komıssııanyń teń tóraǵasy bolyp tabylatyndyǵyn aıta kele, fın mınıstrimen yntymaqtastyqtyń barlyq baǵyttary boıynsha 6 jumys tobyn qurǵandyǵyn jetkizdi.
«Búgin qol qoıylǵan qujat bir baǵyt boıynsha jumystyń nátıjesi. Sondyqtan «jasyl» ekonomıkany damytýda fın tehnologııasyn, kompanııalaryn tartýǵa tıispiz dep oılaımyz. Avstrııa Tehnologııalar ınstıtýty jaıynda barlyǵy biledi, sebebi ol álemde «jasyl» ekonomıka men energetıkany damytý turǵysynda aldyńǵy qatarly uıym. Olarda biregeı jobalar bar jáne biz osylardy elimizde qoldana alar edik»,-dep toqtaldy mınıstr.
Munymen qosa, Qanat Bozymbaev qaldyqtardy óńdeýde Latvııanyń tájirıbesin zertteý boıynsha josparlar bar ekenin de aıta ketti.
