Qazaqstan jasyl damýdyń álemdik úrdisterin belsendi ustanady - Asqar Shákirov
Kezdesýge qatysýshylar energetıkadaǵy qazirgi jaǵdaı, sońǵy tehnologııalyq jańalyqtar men taza energııaǵa kóshýge baılanysty onyń geosaıası, áleýmettik-ekonomıkalyq jáne ekologııalyq saldaryn talqylady.
Dástúrli energetıka jahandyq jylynýǵa áser etetin býlaný gazdarynyń shyǵaryndysy týyndaıtyn negizgi kóz ekeni, osyǵan baılanysty joǵaryda aıtylǵan aýysý kezeńinde elder men olardyń parlamentteriniń úılestirilgen ustanymy men ózara is-qımyly qajet bolatyny atap ótildi.
EQYU PA vıtse-prezıdenti – ornyqty damý maqsattary salasyndaǵy arnaýly ókil Asqar Shákirov óz sózinde Qazaqstan dástúrli energetıkalyq resýrstardyń kóptigine qaramastan, ODM iske asyrý aıasynda «jasyl» damýdyń álemdik úrdisterin belsendi ustanatynyn atap ótti.
Prezıdent Qasym-Jomart Toqaev atmosferaǵa býlaný shyǵaryndysyn 2030 jylǵa deıin 15%-ǵa azaıtý jáne Qazaqstan 2060 jylǵa qaraı kómirteginen beıtarap bolýǵa qol jetkizý mindetin alǵa qoıǵan bolatyn.
Dıalogqa qatysýshylar energııa tıimdiligi, elektrlendirý jáne bıootyn men sýtegine kóshý esebinen energetıka sektoryndaǵy shyǵaryndylardy 97%-ǵa deıin qysqartýdy kózdeıtin kómirteginen beıtarap bolýǵa qol jetkizý jónindegi ázirlengen doktrınamen tanysty.
Tóraǵa orynbasary ǵylymı-tehnıkalyq progress energetıkanyń ótpeli kezeńderiniń ajyramas bóligi retindegi mańyzyn talqylaý turǵysynda jáne jalpy qazirgi zamanǵy qaterlerge jaýap aıasynda bizdiń Memleket basshysynyń bıylǵy 11 qańtarda Parlamentte sóılegen sózinde tehnıkalyq baǵyttarda mamandar daıarlaýǵa basymdyq berý jóninde jarııalaǵanyn atap ótti.
Osyǵan baılanysty Qazaqstanda saladaǵy álemdik jetekshi joǵary oqý oryndarynyń fılıaldaryn ashý josparlanýda.
Sondaı-aq «jasyl ósý» protsesinde bilim alýǵa qoljetimdilikti qamtamasyz etý jáne áleýmettik qorǵaý sharalaryn ázirleýmen birge áleýmettik máselelerdiń barlyq salalary kózdelýi tıis ekendigi atap ótildi.
EQYU PA ekonomıkalyq máseleler jónindegi jalpy komıtetiniń múshesi Ǵumar Dúısembaev ta veb-dıalogqa qatysty.
