Qazaqstan jastarynyń 9,9 paıyzy belsendi túrde din ustanady - Gúlshara Ábdiqalyqova
Konferentsııa jumysyna Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasynyń músheleri, ortalyq jáne jergilikti atqarýshy memlekettik organdardyń, úkimettik emes jáne halyqaralyq uıymdardyń, dinı birlestikterdiń ókilderi, stýdent jastar, sarapshylar qatysty.
«Búgingi tańda Qazaqstanda 4 mln jastar bar. Din isteri jáne azamattyq qoǵam mınıstrliginiń málimeti boıynsha qazirgi tańda jastardyń 79,6%-y dinı kózqarastardy ustanady. Olardyń arasyndaǵy dindi belsendi ustanýshylardyń úlesi 9,9%. 2013 jyldan bastap, QR Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııasy din isteri jónindegi ókiletti organmen birlesip, elimizdiń 10 óńirinde «Áıel jáne din» atty jobany júzege asyryp keledi», - dedi QR Memlekettik hatshysy.
Memlekettik hatshy Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýynda dinı ekstremızmdi nasıhattaýdyń aldyn alý boıynsha jumys júrgizý qajettigi týraly mindetter qoıǵanyn jáne bul sharaǵa úkimettik emes sektor men dinı birlestikterdi belsendi qatysýǵa shaqyrǵanyn atap ótti.
«Dindar adamdardyń radıkaldanýynyń negizgi oshaǵy Internet. Aıtalyq, aǵymdaǵy jyldyń birinshi toqsanynda qazaqstandyq Internet keńistikte 100 myńnan astam terrorızm jáne ekstremızm ıdeıalaryn taratý derekteri anyqtalyp, olardy joıý sharalary qolǵa alyndy. Quqyq qorǵaý organdarynyń júıeli jumystarynyń arqasynda ótken jyldyń 6 aı ishinde ekstremızm jáne terrorızm nyshany bar 315 qylmys tirkelgen. 12 ekstremıstik aktilerdiń joly kesildi. Memleket tarapynan júıeli negizde halyqtyń túrli deńgeıleri arasynda maqsatty túrde túsindirý jáne aldyn alý jumystary júrgizilýde. Dástúrli emes dinı baǵytty ustanýshylardyń 32%-y nysanaly saýyqtyrý sharalarymen qamtyldy», - dedi G.Ábdiqalyqova.
Memlekettik hatshynyń aıtýynsha, terrorıstermen birge shet elge ketip, soǵys qımyldaryna qatyspaq bolǵan 91 qazaqstandyqqa elden shyǵýyna tosqaýyl qoıyldy. Terrorıstik jáne dinı-ekstremıstik sıpattaǵy qylmystary úshin 123 adam sottalyp, qylmystyq jazasyn óteýde.
Gúlshara Ábdiqalyqova búgingi tańdaǵy mańyzdy mindet - jastar men áıelderdiń boıynda dinı ekstremıstik uıymdardyń nasıhattaryna qarsy turatyn berik ımmýnıtet qalyptastyrý qajet ekenin atap ótti.
Іs-shara sońynda Memlekettik hatshy G.N.Ábdiqalyqova áıelder men jastar arasyndaǵy dinı ekstremızmge qarsy is-qımyl jónindegi birqatar naqty mindetterdi belgiledi.
