Qazaqstan jastarynyń 40 paıyzdan astamy shetelge ketýdi josparlaýda - zertteý
«Eger demografııalyq kórsetkishterge qaraıtyn bolsaq, halyq sany artyp keledi. Búginde bizde 18,6 mln-nan astam adam bar. Halyq sany tabıǵı ósim esebinen artýda. Degenmen elden jastardyń ketýiniń arta túsýi alańdatarlyq jaıt bolyp otyr. Jastar trendtin zertteý aıasyndaǵy saýalnama málimetterine sáıkes, olardyń kópshiligi Qazaqstannan ketýdi josparlaýda. Naqtyraq aıtar bolsaq, 15 pen 29 jas aralyǵyndaǵy qazaqstandyqtardyń shamamen 42 paıyzy shetelge oqýǵa nemese turaqty turýǵa ketýdi josparlap júr», - dedi ol «Aqyldy jastardyń shetelge ketýi. Sebepteri jáne oǵan qalaı qarsy turýǵa bolady?» taqyrybyndaǵy dóńgelek ústel barysynda.
Onyń málimetinshe, shetelde turyp bilim alyp jatqan jastardyń jartysyna jýyǵy sol jaqta qalyp qoıady. Al shamamen 40 paıyzy qyzyqty jumys usynǵan jaǵdaıda Qazaqstanǵa oralýy múmkin.
«Qazaqstanda ómir súretin orta jastaǵylar ortaǵa jaqsy beıimdelgen. Al memlekettik qyzmette, iri bızneste ózine oryn joq dep sanaıtyn jastar ózge elderge nazar salyp otyr. Kóshi-qon kóńil-kúıin aıqyndaıtyn negizgi faktorlar mynalar: óziniń materıaldyq ál-aýqatyn jaqsartý, keleshektiń, mansap jolynda joǵarylaý men damýdyń joqtyǵy, sheteldegi bilim berý qyzmetteriniń joǵary sapasy», -dedi Dildá Maıdanbekova.
Onyń atap ótýinshe, Qazaqstandaǵy orta jáne joǵary bilim sapasyndaǵy problema qarjylandyrý deńgeıimen tikeleı baılanysty bolyp otyr.
«Máselen, 2016 jyly joǵary bilim berýge arnalǵan memlekettik bıýdjettik shyǵystary kúndizgi bólimde oqıtyn bir stýdentke 504 dollardy qurady. Salystyrmaly túrde aıtar bolsaq, bul kórsetkish Reseıde 8,8 myń, Qytaıda 3 245, Túrkııada 3 590, Ońtústik Koreıada 9 656, AQSh-ta 11 319 dollardy quraıdy», - dedi ol.
