Qazaqstan jastaryna «Táýelsizdik urpaqtary» granty berilmek
NUR-SULTAN. QazAqparat – QR Úkimetiniń qaýlysymen «Táýelsizdik urpaqtary» granty taǵaıyndaldy, dep habarlaıdy QazAqparat.
«Grant berýdiń maqsaty belsendi shyǵarmashyl jastar qaýymdastyǵyn qalyptastyrýǵa baǵyttalǵan, jastardyń jańa jáne qoldanystaǵy bastamalaryn memlekettik qoldaý», - delingen Úkimet qaýlysynda.
Grant berý mindetteri:
talantty jáne talapty jastardy qoldaý;
eldiń áleýmettik-ekonomıkalyq damýy úshin praktıkalyq qyzyǵýshylyq tanytatyn jastardyń ınnovatsııalyq jobalary men ǵylymı-tehnıkalyq ázirlemelerin anyqtaý jáne qoldaý;
jastardyń jańa jáne qoldanystaǵy startap-jobalaryn iske asyrýǵa járdem kórsetý;
jastar arasynda shyǵarmashylyq qyzmetti tanymal etý.
Granttyń mólsheri men sanyn Úkimet jyl saıyn belgileıdi.
Granttar QR azamattaryna jańa ıdeıalar men bastamalardy iske asyrý úshin kelesi baǵyttar boıynsha konkýrstyq negizde beriledi:
«Ǵylym» - ǵylymnyń basym sektorlarynda jańa ǵylymı jobalar men zertteýlerdi iske asyrý úshin;
«Mádenıet» - Qazaqstannyń mádenı murasyn tanymal etýge, halyqtyq mádenı dástúrler men ónerdi ilgeriletýge baǵyttalǵan jobalardy iske asyrý úshin;
«Aqparattyq tehnologııalar» - jańa IT-sheshimder men jobalardy, onyń ishinde bastaýshy startap-jobalardy iske asyrý jáne ázirleý úshin;
«Bıznes» - ekonomıkanyń basym sektorlarynda jańa bıznes-ıdeıalardy iske asyrý úshin;
«Medıa» - jańa medıa-jobalardy, onyń ishinde jastar úshin tanymdyq, paıdaly, qyzyqty kontentti qurý jónindegi jobalardy iske asyrý úshin.
Konkýrstyq ótinimder memlekettik nemese orys tilderinde qabyldanady jáne onda tómendegi málimet bolýy qajet:
jobanyń sıpattamasy;
jobanyń beıneprezentatsııasy (60 sekýndtan kóp emes);
shyǵyndar smetasynyń jobasy;
zııatkerlik menshik týraly málimetter (bar bolsa).
Qaýly 2021 jylǵy 20 shildeden bastap qoldanysqa engiziledi.
