Qazaqstan jastary jyldyń eń basty qujatyna qol qoıdy
ASTANA. QazAqparat - Qazaqstan jastary Forýmynyń qatysýshylary «Qazaqstan jastary-2016» ulttyq baıandamasyn maquldady, dep habarlaıdy QazAqparat.
Bul týraly búgin qorytyndy baspasóz máslıhatynda QR Din jáne azamattyq qoǵam isteri mınıstrligi jastar saıasaty departamentiniń dırektory Ǵabıdolla Ospanqulov málim etti.
«Atalǵan forýmnyń negizgi ereksheligi - munda jastardyń barlyq sanaty qamtyldy. Forým úsh kúnge jalǵasty. Suhbat alańdarynda ótken talqylaýlardyń nátıjesinde tıisti usynystar túzildi. Plenarlyq otyrysta bul usynystar maquldanǵan bolatyn. Sonymen birge «Qazaqstan jastary-2016» ulttyq baıandamasy da tyńdalyp, kópshiliktiń uıǵarymymen qabyldandy», - dep atap ótti ol.
Aıta ketken jón, atalmysh qujatta memlekette júzege asyrylyp otyrǵan jastar saıasatyna taldaý jasalyp, osy salanyń damýyna qatysty birqatar naqty josparlar engizildi.
Eske salsaq, 30 qarasha men 1 jeltoqsan aralyǵynda Astanada QR Táýelsizdiginiń 25 jyldyǵyna arnalǵan Respýblıkalyq jastar forýmy ótken bolatyn.
Uıymdastyrýshylardyń atap ótkenindeı, forým Qazaqstan Táýelsizdiginiń 25 jyly ishinde jastar men jastar saıasatynyń jetken jetistikterin kórsetýge baǵyttaldy. 1 jeltoqsan kúni forým aıasynda QR Prezıdenti Nursultan Nazarbaevtyń jastarmen kezdesýi ótti. Sharaǵa 1500-ge tarta adam qatysty, onyń ishinde 700 adam óńirlerden kelgen.
