Qazaqstan jastary nelikten jumyssyz: Májilis tóraǵasy sebebin aıtty
ASTANA. QazAqparat - Májilis tóraǵasy Nurlan Nyǵmatýlın stýdent jastarǵa mamandyǵy boıynsha jumysqa ornalasý nelikten qıyn ekenin túsindirdi, dep habarlaıdy QazAqparat tilshisi.
«Árıne, eńbekpen qamtý salasynda jetken jetistikterimiz kóp. Biraq sheshilmegen suraqtar da az emes. Ol birinshiden, ózin-ózi jumyspen qamtyǵan azamattarǵa qatysty. Memleket basshysy olardy esepke alý, kóleńkeli aımaqtan shyǵarý týraly tapsyrma berdi. Bul óz kezeginde Úkimet, ortalyq jáne jergilikti memlekettik organdar jáne depýtattyq korpýstyń birlese jumys isteýin qajet etedi. Búginde bizdiń depýtattarymyz «Halyqtyń jumyspen qamtylýyn formalızatsııalaý týraly» zań jobasymen jumysqa kiristi», - dep toqtaldy N. Nyǵmatýlın jumyspen qamtý máselelerine arnalǵan parlamenttik tyńdaý barysynda.
Budan bólek, Májilis tóraǵasy búginde bilim berý mekemelerinde mamandardy daıarlaý naryq talaptaryna saı bolmaı turǵanyn eskerdi.
«Sebebi kadrlarǵa degen suranysqa baılanysty tereń taldaý jasalmaıdy. Bilim berý baǵdarlamalary da qazirgi talapty tolyqtaı oryndamaı otyr. Sol sebepten, stýdent jastarǵa oqýyn bitirgennen keıin mamandyǵy boıynsha jumys tabý qıyn. Osy máseleni sheshý úshin kadrlarǵa degen qajettilik monıtorınginiń tıimdi júıesin qurý qajet dep esepteımiz. Ol - memlekettik tapsyrysty durys qalyptastyrýǵa úlken múmkindik beredi», - dedi N. Nyǵmatýlın.
Onyń atap ótýinshe, búgingi kúni elimizde 7 mıllıonǵa jýyq jumyskerdiń joǵary jáne orta kásiptik bilimi bar. Ol jumyspen qamtylǵan barlyq azamattardyń 79 paıyzyn quraıdy. Bul Qazaqstandaǵy eńbek resýrstarynyń sapasy joǵary ekeniniń dáleli.
