Qazaqstan jastary kongresi Elbasy Joldaýyndaǵy bastamalardy tolyq qoldaıdy
ASTANA. QazAqparat - Qazaqstan jastary kongresi QR Prezıdentiniń 2017 jylǵy 30 qańtardaǵy Qazaqstan halqyna arnaǵan Joldaýyna baılanysty úndeý joldady.
«Búgingi kúnde Qazaqstan jastary azamattyq qoǵamnyń tolyq quqyqty, talapty jáne jaýapty sýbektisine aınalǵan. Jastar úshin kóptegen baǵdarlamalar iske asyrylýda. Jyl saıyn myńdaǵan jas mamandar, joǵarǵy oqý oryndary men kolledj túlekteri ómirlik sóreniń jańa múmkindikterine ıe bolýda. Munyń barlyǵy Elbasymyzdyń kóregen saıasatynyń jemisi bolyp tabylady.
Qazaqstan jastarynyń kongresi Elbasynyń «Qazaqstannyń úshinshi jańǵyrýy: jahandyq básekege qabilettilik» joldaýynda ataǵan bastamalaryn tolyqtaı qoldaıtyny týraly málimdeıdi», delingen úndeýde.
Sondaı-aq úndeýde 25 jyl ishindegi qarqyndy ári maqsatty damyǵan Qazaqstan álem sahnasynda bedeldi orynǵa ıe bolǵandyǵy, bul jetistiktiń alǵashqy eki jańǵyrý kezeńderiniń nátıjesi ekendigi, ol jyldarda jastar elimizdiń tabystarynda mańyzdy ról atqarǵan oqıǵalarynyń aldyńǵy qatarly kýágerleri bolǵandyǵy aıtylady.
"Prezıdent óziniń joldaýynda elimizge damyǵan elderdiń qataryna qosylýǵa múmkindik beretin kelesi mańyzdy baǵyttarǵa ekpin qoıdy. Olar - ekonomıkany qarqyndy túrde tehnologııalyq jańǵyrtý; dástúrli negizgi salalardy damytý; eńbek naryǵyn jańǵyrtý; makroekonomıkalyq turaqtylyq; adamı kapıtaldyń sapasyn kóterý; ınstıtýtsıonaldyq túrlendirý, qaýipsizdik, sybaılas jemqorlyqpen kúres.
Qazaqstan jastaryn biriktirýshi jastar uıymy retinde, biz Prezıdent bastamalary qazirgi zaman talaptaryna saı dep oılaımyz. Elimizdiń jas býyny úshin bilim, eńbek naryǵy, aqparattyq tehnologııalardyń damýy suraqtary erekshe mańyzdy. 2015 jyly Elbasymyz «Tegin kásibı-tehnıkalyq bilim» jobasyn usynǵan bolatyn. Osy jyly atalǵan joba óziniń jappaı iske asyrylý satysyna kóteriledi jáne kóptegen stýdentterge óz jolyn tabýǵa kómektesedi.
Sonymen qatar, Nursultan Ábishuly, eń aldymen bilim berý júıesiniń rólin ózgertý qajet ekenin belgileıdi. Elbasynyń Joldaýy boıynsha: «Bizdiń mindetimiz - bilimdi ekonomıkalyq ósý modeliniń ortalyq túıini qylý bolyp tabylady. Oqý baǵdarlamalaryn krıtıkalyq oılaý, ózdiginen aqparat izdeý daǵdylaryn damytýǵa baǵyttaý qajet». Prezıdentimiz ІT-bilim, qarjylyq saýattylyqty qalyptastyrý men patrıottyq tárbıeniń ózektiligin kórsetti. Munyń barlyǵy jastarda memleketimizdiń jańa damý kezeńinde qajetti, ómir úshin mańyzdy jańa daǵdylar men qabiletterdi qalyptastyrady. Bilim berý júıesinde ІT-salanyń qarqyndy damýy jáne muǵalimderdiń kvalıfıkatsııalarynyń joǵarylaýy qala men aýyl mektepteriniń arasyndaǵy bilim sapasynyń aıyrmashylyǵyn azaıtýǵa septigin tıgizeri aıqyn.
Jas qazaqstandyqtar úshin eń mańyzdy másele - jumysqa ornalasý máselesi. Eńbek naryǵyn jańǵyrtý maqsatynda Elbasymyz óz Joldaýynda jumyskerlerdiń jańa zaman salalarynyń mamandyqtaryna kóshýi úshin qolaıly jaǵdaılar jasaý mindetin qoıdy. Osyǵan oraı, Prezıdent eńbekpen qamtýdyń jańa Jol kartasyn ázirleý qajettiligin atap ótti. Mundaı Jol kartalary jumys berýshilerdiń qysqartylǵan jumyskerlerdi qaıta daıyndaý jáne jańa jumysqa ornalastyrýdaǵy mindetterin aıqyndap kórsetetin bolady.
Qazaqstan jastarynyń atynan Elbasy Joldaýynda atalǵan baǵyttardy qoldaıtynymyz týraly málimdeımiz! Álemniń jahandanýy bizden jańa kózqarastar men eńbek naryǵyn talap etedi.
«Qazaqstannyń úshinshi jańǵyrýy: jahandyq básekege qabilettilik» atty Elbasynyń joldaýy bizge «Máńgilik el» ulttyq ıdeıasyna jetýde serpindi qadam jasaýǵa, ekonomıkalyq ósýdiń jańa modelin qalyptastyrýda, básekelestik qabiletimizdi nyǵaıtýda jáne 2030 jyly 30 damyǵan elder qataryna qosylýymyzǵa zor yqpalyn tıgizetinine senemiz, delingen úndeýde.
