Qazaqstan jastar quramasynyń fýtbolshysy 15 mınýtta úzdik nátıje kórsetti
ASTANA. KAZINFORM – BBC 2027 jylǵy Eýropa chempıonatynyń irikteý kezeńindegi Anglııa men Qazaqstan jastar quramalary arasyndaǵy matchqa qatysqan fýtbolshylardyń oıynyna baǵa berdi, dep habarlaıdy Sports.kz.
Kezdesýdiń úzdik oıynshysy dep Ýıll Lenkshır tanyldy. Ol 69-mınýtta alańǵa shyǵyp, 90+1-mınýtta gol soqty. BBC onyń oıynyn 8,62 upaıǵa baǵalady.
Qazaqstan quramasynda eń joǵary baǵany «Qaısar» klýbynyń jartylaı qorǵaýshysy Salamat Jumabekov aldy. Ol alańda nebári 15 mınýt oınaǵanyna qaramastan, 5,50 upaı jınady. Fýtbolshy ekinshi taımda qosalqy quramnan shyqqan.
– Qazaqstan quramasy sapynda Salamat Jumabekov ózgelerden aıqyn basym nátıje kórsetti. Nebári 15 mınýt oınaǵan jartylaı qorǵaýshyǵa 5,50 upaı berildi, – delingen málimette.
Qazaqstandyq fýtbolshylar arasynda ekinshi kórsetkish «Astana» jartylaı qorǵaýshysy Maqsat Abraevqa tıesili. Onyń oıyny 3,00 upaıǵa baǵalandy. Qalǵan qazaqstandyq oıynshylardyń baǵasy 2,67-den 2,80 upaıǵa deıingi aralyqta boldy.
Osy jeńisten keıin Anglııa quramasy 22 upaı jınap, D tobynda kósh bastap tur. Qazaqstan tórt upaımen altynshy, sońǵy orynda keledi.
Aıta keteıik, Qazaqstan quramasynyń eki fýtbolshysy matchtarǵa qatysa almaıtyn boldy.
