Qazaqstan jastar quramasy shaıbaly hokkeıden tarıhı jetistikke qol jetkizdi
Majarstan astanasy Býdapeshtte uıymdastyrylǵan shaıbaly hokkeıden jastar arasyndaǵy IA dıvızıonynyń álem chempıonaty aıaqtaldy, dep habarlaıdy Kazinform.
Týrızm jáne sport mınıstrligi baspasóz qyzmetiniń málimetinshe, jahandyq dodada baq synaǵan Qazaqstan quramasy merziminen buryn birinshiliktiń bas júldesin jeńip aldy. Jerlesterimiz bastapqy tórt oıynda Majarstan, Frantsııa, Danııa jáne Japonııa quramalaryn tize búktirse, sońǵy matchta Aýstrııa jastaryna býlıtter serııasynda ese jiberdi.
Jarys qorytyndysynda Sergeı Starygın shákirtteri 13 upaımen top jardy. Frantsııa quramasy – ekinshi, danııalyqtar úshinshi orynǵa ıe boldy. Ulttyq qurama qaqpashysy Vladımır Nıkıtın týrnırdiń úzdik qaqpashysy atandy.
Jastar quramasynyń osy jeńisinen keıin Qazaqstan tarıhı jetistikke qol jetkizdi. ıAǵnı, 2024 jyly ótetin álem chempıonatynyń top-dıvızıonynda birden úsh quramamyz – jasóspirimder, jastar jáne eresekter arasyndaǵy ulttyq qurama óner kórsetý múmkindigine ıe boldy.
«Bıyl bizdiń shaıbaly hokkeıden ár jastaǵy ulttyq quramalarymyz tamasha nátıjege qol jetkizip, tarıhta alǵash ret álem chempıonatynyń elıtaly dıvızıonynda oınaıtyn boldy. Osy nátıjelerden-aq elimizde shaıbaly hokkeıdiń qarqyndy damyp kele jatqanyn baıqaýǵa bolady. Jigitter halyqaralyq arenada elimizdiń namysyn abyroımen qorǵap, Qazaqstannyń hokkeı eli ekenin dáleldedi. Jerlesterimizdi jarqyn jeńisterimen shyn júrekten quttyqtaımyn!» - dedi Týrızm jáne sport mınıstri Ermek Marjyqpaev.
Eske sala keteıik, osy jyldyń sáýir aıynda elimizdiń jasóspirimder quramasy IA dıvızıonyndaǵy álem chempıonatynda birinshi oryndy ıelenip, elıtaly topqa kóterilgen bolatyn. Ol kezde de ulttyq quramaǵa Sergeı Starygın jetekshilik etken edi. Al eresekter quramasy toptyq kezeńde úsh ret jeńiske jetip, elıtaly toptaǵy ornyn saqtap qaldy jáne top-dıvızıonda qatarynan tórtinshi jyl oınaǵaly otyr.
