Qazaqstan jastar arasyndaǵy ólim kórsetkishi boıynsha Reseıden keıingi ekinshi orynda -Ulttyq taldaý ortalyǵy
ASTANA. Aqpannyń 16-sy. QazAqparat /Qanat Mámetqazyuly/ - Qazaqstan jastar arasyndaǵy ólim kórsetkishi boıynsha Reseıden keıingi ekinshi orynda tur.
QR Úkimeti janyndaǵy «Ulttyq taldaý ortalyǵy» AQ-nyń «Qazaqstandaǵy áıelder men balalardyń ómirine ekonomıkalyq daǵdarystyń, azyq-túlik pen otynǵa baǵa turaqsyzdyǵynyń áseri» atty zertteýi osyndaı qorytyndy shyǵarǵan, dep habarlaıdy QazAqparat.
«Qazaqstanda 15-19 jastaǵy jasóspirimder men 20-24 jastaǵy jastar arasyndaǵy ólim kórsetkishiniń joǵarylyǵy baıqalyp otyr. Dál osy problemaǵa qatysty naqty sebepter áli de túsiniksiz. Al resmı málimetterge súıensek, Qazaqstan jastar arasyndaǵy ólim boıynsha álem elderi arasynda Reseıden keıingi ekinshi orynǵa shyqqan. Sonymen birge, daǵdarystyq jaǵdaıdy esepke alsaq, bul kórsetkishtiń birshama ósetinin de topshylaýǵa bolady. Shynymen de, eger jastar daǵdarys kezeńinde ózderin qorǵansyz sezinip, áljýazdar qatarynan kórse, onda olar ózderiniń bolashaǵyna múldem senimsizdikpen de qaraýy múmkin», deıdi Ulttyq taldaý ortalyǵy basqarma tóraıymy Aıana Manasova.
