Qazaqstan jasóspirimder quramasy álem chempıonatynda 5-oryn úshin talasady

ASTANA. KAZINFORM – Túrkııanyń Antalııa qalasynda ótip jatqan jasóspirimder arasynda Devıs kýbogynyń (komandalyq álem chempıonaty) fınaldyq kezeńinde Qazaqstan quramasy úzdik bestikke iligý úshin kortqa shyǵady.

Keshe qazaqstandyq jasóspirimder shırek fınalda Japonııa komandasyna 0:2 esebimen jol berdi. Japonııalyqtar buǵan deıin Devıs kýbogynda eki ret, 2010 jáne 2019 jyldary jeńimpaz atanǵan bolatyn.

Búgin Sergeı Kvaktyń shákirtteri Qytaı Taıbeıin jeńdi. Aldymen Damır Jalǵasbaı Vang Ien Chýndy 6:0, 6:2 esebimen tize búktirdi.

Ekinshi oıynda Zańǵar Nurlanuly tamasha jeńiske qol jetkizdi. Ol birinshi partııada Chen Kýan Choýdan 3:5 esebimen utylyp jatyp, kambek jasaı aldy – 7:6 (7:3). Ekinshi sette qarsylasyn 6:2 esebimen qapy qaldyrdy.

Osylaısha, Qazaqstan jasóspirimderi 16 qarashada Frantsııa quramasymen besinshi oryn úshin talasady. Qazaqstandyqtar álemniń tórt dúrkin chempıony – Frantsııany toptyq básekede jeńgen edi.

Ótken jyly fınaldyq kezeńge alǵash ret joldama alǵan qazaqstandyq jasóspirimder úzdik ondyqqa ilikken edi. Bıylǵy nátıjesi odan da joǵary bolmaq.

Eske sala keteıik, budan buryn Qazaqstan jasóspirimder quramasynyń álemniń tórt dúrkin chempıonyn utqanyn jazǵan edik.

Tennısten Qazaqstan – Koreıa matchyn Zarına Dııas bastaıdy.