Qazaqstan jasóspirimder arasyndaǵy Azııa oıyndarynda alǵashqy altyn medalin jeńip aldy

ASTANA. KAZINFORM – Qazaqstan quramasy Manama qalasynda (Bahreın) ótip jatqan jasóspirimder arasyndaǵy Azııa oıyndarynda tas joldaǵy velosporttan altyn medal jeńip aldy.

Otandastarymyz jekeleı ýaqytqa jarys formatyndaǵy aralas quramdaǵy komandalyq estafetada úzdik nátıje kórsetti.

Birinshi kezeńnen keıin Qazaqstan quramasy ýaqyt boıynsha úshinshi orynda kele jatqan. Alaıda sońǵy kezeńde sportshylarymyz qarqyn qosyp, márege birinshi bolyp jetti.

Ulttyq quramanyń sapynda Kırıll Polyshev, Danıl Tretıakov, Rınat Erik, Irına Ivanovskaıa, Valerııa Kýznetsova jáne Anel Tashbaı óner kórsetti.

Alǵashqy hattama boıynsha Iran quramasy kúmis, Taıbeı quramasy qola medal ıelengen bolatyn.

Keıin hattama qaıta qaralyp, Iran komandasy jarysty aıaqtamaǵan dep tirkeldi. Osyǵan baılanysty Taıbeı ekinshi orynǵa kóterilip, Qytaı quramasy úzdik úshtikke endi.

Bul jeńis – Qazaqstan quramasynyń osy Azıadadaǵy alǵashqy altyn medali.

Aıta keteıik, Astanada kórkem gımnastıkadan Grand Prix Alem básekesi bastaldy.