Qazaqstan jasóspirimderiniń 3% kún saıyn energetıkalyq sýsyn ishedi – zertteý

ASTANA. QazAqparat – Qazaqstan Dúnıejúzilik densaýlyq saqtaý uıymymen birlesip, 11, 13 jáne 15 jastaǵy oqýshylardyń tamaqtaný ádetterine zertteý júrgizdi. Nátıjesi «Qazaqstan oqýshylarynyń ómir salty faktorlary, olardyń fızıkalyq, psıhıkalyq densaýlyǵy men ál-aýqaty» ulttyq esebinde jarııalandy, dep habarlaıdy QazAqparat tilshisi.

Oqýshylardyń 61,1% kún saıyn sabaq kúnderi tańǵy asyn ishedi. 15 jasqa qaraı qyzdardyń úshten biri jáne uldardyń shamamen 1/5 bóligi tańǵy as ishpeıdi. 2018 jyly júrgizilgen aldyńǵy zertteýmen salystyrǵanda, kún saıyn tańǵy as ishetin balalardyń úlesi 62,6%-dan 61,1%-ǵa deıin tómendedi.

Tórt jasóspirimniń biri kún saıyn jemis jeıdi (26,5%), al kókónisterdi balalardyń úshten biri (36,1%) jeıdi. Qyzdar kókónisterdi jıi tutynady. 2022 jyly jemisterdi (10 paıyzdyq tarmaqqa) jáne kókónisterdi (6 paıyzdyq tarmaqqa) kúndelikti qabyldaý deńgeıi tómendegen.

Jasóspirimderdiń 14,4%-y kún saıyn quramynda qanty bar gazdy sýsyndardy paıdalanady. Uldarda bul kórsetkish qyzdarǵa qaraǵanda joǵary, 15 jasqa qaraı táttilendirilgen sýsyndardy kúndelikti tutyný artady. Apta saıyn (kúnine 1 retten 5-6 retke deıin) balalardyń 66,6%-y qantty sýsyndar ishedi.

Dástúrli túrde kámpıtter men shokoladty kúndelikti tutyný uldarǵa (22,9%) qaraǵanda qyzdarda (30,4%) joǵary.

Jasóspirimderdiń kópshiligi aptasyna 1 retten az nemese energetıkalyq sýsyndardy múldem qoldanbaıdy. Degenmen balalardyń 3%-y kún saıyn energetıkalyq sýsyndar ishedi. 17,5%-y aptasyna bir retten 5-6 retke deıin energetıkter ishedi. Olardyń ishinde uldar – 19,1%, qyzdar – 15,8%.

«Osylaısha, apta saıyn jasóspirimderdiń 1/5 bóligi (20,5%) zııandy sýsyndar ishedi», - delingen habarlamada.