Qazaqstan jasóspirimder quramasy álem chempıonatynda Danııaǵa ese jiberdi
ASTANA. QazAqparat – Frantsııanyń Anje qalasynda 18 jasqa deıingiler arasynda ótip jatqan álem chempıonatynda Qazaqstan quramasy Danııamen kezdesti, dep habarlaıdy QazAqparat tilshisi.
Birinshi dıvızıonnyń A tobynda qazaqstandyqtar úshinshi kezdesýinde Danııaǵa 3:8 esebimen jol berdi.
Birinshi kezeńde 4-mınýtta Asanáli Rýslanulynyń pasynan keıin Semen Sımonov esep ashqanymen, budan keıin qazaqstandyqtar óz qaqpasyna úsh gol jiberip aldy.
Ekinshi taımda danııalyqtar esepti 4:1-ge jetkizgennen keıin san basymdylyǵyn paıdalanǵan Ádil Beısembaev mergendik tanytty. Danııalyqtar besinshi goldy soqqannan soń Á.Beısembaevtyń pasyn Aleksandr Kım múlt jibermedi. Alaıda danııalyq hokkeıshiler taǵy úsh shaıbany Qazaqstan qaqpasyna engizdi.
Osylaısha, Qazaqstan úsh matchynda birinshi ret jeńilip qaldy. Buǵan deıin olar Majarstan (3:0) men Japonııany (5:0) iri eseppen utqan edi. Bul topta sondaı-aq Ýkraına, Frantsııa quramalary óner kórsetedi.
27 sáýir kúni qazaqstandyqtar Ýkraınamen sheberlik baıqasady. Match Astana ýaqytymen saǵat 16.30-da bastalady.
Eske sala keteıik, budan buryn hokkeıden álem chempıonatynda Qazaqstan jasóspirimderiniń Japonııany oısyrata jeńgenin jazǵan bolatynbyz.
