Qazaqstan «jasyl» energııaǵa kóshý arqyly ınvestıtsııalyq tartymdylyqty arttyryp otyr
ASTANA. KAZINFORM – 2026 jyly mınıstrlik ekologııalyq taza energııa óndirý kólemin 8,8 mlrd kVt·saǵ deıin arttyrýdy kózdep otyr. Bul týraly Energetıka mınıstrligi habarlady.
Eki aptadan keıin Astanada Óńirlik ekologııalyq sammıt ótedi. Sharanyń mańyzdy oqıǵasy retinde Energetıka mınıstrliginiń «Ortalyq Azııadaǵy ádil energetıkalyq ótý: saıasat, ınvestıtsııalar jáne adamı kapıtal» atty paneldik sessııasy uıymdastyrylady.
Kómirtekti beıtaraptyqqa jetý jolynda energetıkalyq qaýipsizdik pen turaqty damýdy qamtamasyz etýdiń negizgi quraldarynyń biri — jańartylatyn energııa kózderine kezeń-kezeńimen kóshý.
Búgingi tańda Qazaqstanda JEK sektory qarqyndy damyp jatyr: elde jalpy qýaty 3,5 GVt bolatyn 162 nysan jumys isteıdi, al 2025 jyldyń qorytyndysy boıynsha jalpy energııa teńgerimindegi «jasyl» generatsııanyń úlesi 7%-ǵa jetti. Ótken jyly energetıkalyq júıe qýaty 503 MVt bolatyn 9 jańa stantsııamen tolyqty, bul rette JEK nysandary óndirgen elektr energııasynyń naqty kólemi 8,6 mlrd kVt·saǵ bolyp, josparlanǵan kórsetkishterden 19,4%-ǵa asty.
— 2026 jyly mınıstrlik ekologııalyq taza energııa óndirý kólemin 8,8 mlrd kVt·saǵ deıin arttyrýdy kózdep otyr. Іske asyrý josparyna sáıkes jalpy qýaty 245 MVt bolatyn 10 jańa joba iske qosylady, onyń ishinde 4 jel, 5 kún jáne 1 gıdroelektr stantsııasy bar. «Balamaly energııa kózderi týraly» Zańnyń qabyldanýy jáne sýtegi energetıkasyn damytýdyń 2040 jylǵa deıingi tujyrymdamasynyń ózektendirilýi mańyzdy kezeń bolmaq. Investıtsııalardy tartýdyń negizgi quraly retinde aýktsıondyq saýda-sattyq mehanızmi qala beredi, onyń 2024–2027 jyldar aralyǵyndaǵy jalpy kólemi 6,7 GVt bolady, — delingen mınıstrlik habarlamasynda.
Zamanaýı energııa jınaqtaý júıelerimen jabdyqtalǵan jel elektr stantsııalarynyń (JES) mega-jobalaryn salý boıynsha halyqaralyq seriktestikti nyǵaıtýǵa erekshe kóńil bólinip oıyr.
Jambyl oblysynda frantsııalyq TotalEnergies kompanııasy 1 GVt stantsııanyń qurylysyn bastap ketti, al Pavlodar oblysynda Qytaıdyń State Power Investment Corporation korporatsııasymen birlesip qýaty 1 GVt bolatyn uqsas joba iske qosylmaq.
Budan bólek, JEK salasyndaǵy álemdik kóshbasshy — Masdar kompanııasy aýqymdy bastamalardy júzege asyrýǵa kirisýde. 2035 jylǵa deıingi uzaq merzimdi perspektıvada Qazaqstanda 8 GVt-tan astam JEK qýatyn iske qosý josparlanyp otyr, bul ulttyq energojúıeniń turaqtylyǵyn jáne energııa teńgeriminiń tereń ártaraptandyrylýyn qamtamasyz etedi.
Óńirlik ekologııalyq sammıt (RES 2026) — Ortalyq Azııa elderi men basqa da memleketterdiń basyn qosyp, klımattyń ózgerýi, sý resýrstarynyń degradatsııasy, tabıǵı resýrstardy turaqty basqarý sııaqty ótkir ekologııalyq máselelerdi sheshýge baǵyttalǵan halyqaralyq is-shara. RES 2026 Astana qalasynda (Qazaqstan) 2026 jylǵy 22-24 sáýir aralyǵynda ótedi. Sammıtke memleketterdiń, halyqaralyq uıymdardyń, bıznes pen ǵylym salasynyń 1500 delegaty qatysady dep kútilýde.
BUU-men seriktestikte RES 2026 ótkizý bastamasyn Qazaqstan Respýblıkasynyń Prezıdenti Qasym-Jomart Toqaev 2023 jyly BUU Bas Assambleıasynyń 78-sessııasynda aıtqan bolatyn.
Aıta ketelik qazaqstandyqtar jasyl energetıka salasynda qandaı patentter tirkegeni týraly jazǵan edik.
