Qazaqstan jasandy ıntellektini jedel engizbese, básekeden qalyp qoıýy múmkin – maman pikiri
ASTANA. KAZINFORM – Álemde jasandy ıntellekt tehnologııalary óte joǵary qarqynmen damyp keledi. Eger Qazaqstan bul baǵytta jedel qadam jasamasa, bolashaqta jahandyq úrdisterden qalyp qoıý qaýpi bar.
– Biz qazir tez damymaıtyn bolsaq, jasandy ıntellektti memleket deńgeıinde júıeli túrde engizbesek jáne osy salaǵa qarjy tarta almasaq, erteń úlgermeı qalýymyz múmkin, – dedi Shai.pro jasandy ıntellekt jobasynyń negizin qalaýshy Álibek Polatov Jibek joly telearnasynyń Búgin LIVE baǵdarlamasynda.
Onyń sózinshe, Memleket basshysynyń jasandy ıntellekttiń damýyna erekshe mán berýi óte oryndy qadam. Sebebi memlekettik uıymdarmen, bıznes ókilderimen jáne klıenttermen jumys barysynda kópshiliktiń JI múmkindikterin tolyq túsine bermeıtini baıqalady.
– Kóp adam jasandy ıntellektti qalaı jáne qaı jerde qoldaný kerek ekenin, onyń naqty tıimdiligi qandaı ekenin bilmeıdi. Eger biz ony óz strategııamyzǵa júıeli túrde engizbesek, qazaqstandyqtardyń basym bóligi bul tehnologııany paıdalanbaı qalýy múmkin, – dedi maman.
Osy oraıda ol jasandy ıntellektti eń aldymen kvazımemlekettik sektorda, memlekettik uıymdarda jáne bıznes salasynda engizý qajet ekenin atap ótti. Sonymen qatar barlyq deńgeıdegi qyzmetkerlerdi arnaıy oqytý mańyzdy ekenin aıtty.
Álibek Polatovtyń aıtýynsha, Qazaqstanda jasandy ıntellekttiń damýyna kedergi keltirip otyrǵan negizgi máselelerdiń biri – derekterdiń sapasy men olardyń ártúrli vedomstvolarda shashyrańqy kúıde saqtalýy.
– Eger derekterdi bir ortalyqqa jınap, olardy startaptar men jańa jobalarǵa ashyq etsek, otandyq komandalar jasandy ıntellektti paıdalana otyryp, sapaly ári tıimdi ónimder usyna alady, – dedi ol.
Bul baǵytta Astana Hub ekojúıesiniń rólin erekshe atap ótken sarapshy, osyndaı alańdar derekterdi júıelep, startaptarǵa qoljetimdi etse, elimizde jasandy ıntellektti engizý úderisi áldeqaıda jyldam júretinin aıtty.
Sondaı-aq ol 2025 jyldyń basynan beri kóptegen kvazımemlekettik uıymdardyń shai.pro komandasyna ózderi habarlasa bastaǵanyn aıtty. Buǵan negizgi sebep bilikti kadrlardyń jetispeýshiligi.
– Qazaqstanda shetelde iri kompanııalarda jumys istep, kúrdeli baǵdarlamalardy engizý tájirıbesi bar mamandar az. Olardyń kóbi shetelde eńbek etedi jáne ol jaqta suranys joǵary bolǵandyqtan, jumysynan bosatylmaıdy, – dedi joba negizin qalaýshy.
Mamannyń pikirinshe, ekonomıkanyń jedel damýyna jasandy ıntellekt pen tsıfrlandyrý negizgi qozǵaýshy kúsh bola alady. Onyń aıtýynsha, bul turǵyda ár aımaqtyń ustanymy ártúrli.
– AQSh-ta aldymen tehnologııa engizilip, keıin ony retteý tetikteri qalyptasady. Al Eýropada kerisinshe áýeli retteý júrgizilip, sodan soń ǵana jańa sheshimder iske asady. Qazaqstan bolsa eksperıment jasaýǵa daıyn, tez beıimdele alatyn el retinde erekshelenedi, – deıdi sarapshy.
Osy artyqshylyqty tıimdi paıdalana otyryp, Qazaqstan qysqa merzim ishinde jasandy ıntellekt salasynda qarqyndy damı alady. Mamannyń pikirinshe, eldiń Ortalyq Azııa óńirinde AI-habqa aınalýyna tolyq múmkindigi bar. Bul óz kezeginde iri tehnologııalyq jobalardy iske asyryp qana qoımaı, otandyq ónimderdi halyqaralyq naryqqa shyǵarýǵa jol ashady.
Eske salsaq, Qasym-Jomart Toqaev Qazaqstan jaǵdaıynda tsıfrlandyrý men jasandy ıntellektini engizý ishki jalpy ónimge 14 mıllıard dollardan 20 mıllıard dollarǵa deıin kiris ákelýi múmkin ekenin aıtqan edi.
Buǵan deıin Qazaqstanda densaýlyq saqtaý salasynda jasandy ıntellekt dárigerdi almastyratyn qural retinde emes, medıtsınalyq sheshim qabyldaýdy qoldaıtyn tıimdi kómekshi retinde qarastyrylyp otyrǵanyn jazǵanbyz.