Qazaqstan jasandy ıntellektti kúndelikti ómirde qoldaný úshin 1 mln adamdy oqytpaq

ALMATY. KAZINFORM – Oljas Bektenov Alem.ai ortalyǵynyń bazasynda jasandy ıntellekt salasyndaǵy birlesken jobalardy iske asyrý úshin EAEO elderiniń kúsh-jigerin biriktirýdi usyndy.

– Memleket basshysy Qasym-Jomart Toqaev Alem.ai halyqaralyq jasandy ıntellekt ortalyǵynyń negizinde quzyrettilikter ekojúıesin qurý bastamasyn kóterdi. Ol bıyl ashylatyn bolady. Bul bir alańda sheshimderdi birlesip ázirleý úshin jetekshi ІT-kompanııalardy, zertteý zerthanalaryn, startaptar men bilim berý baǵdarlamalaryn biriktirýge múmkindik beredi. Biz Alem.ai ortalyǵynyń bazasynda jasandy ıntellekt salasyndaǵy birlesken jobalardy iske asyrý úshin EAEO elderiniń kúsh-jigerin biriktirýdi usynamyz,– dedi Úkimet basshysy «Digital Almaty 2025» forýmynda.

Sondaı-aq ol tek ІT-mamandardy oqytýda ǵana emes, jasandy ıntellektti kúndelikti ómirde tıimdi qoldanýda keshendi tásildi qamtamasyz etýdiń mańyzy zor ekenin jetkizdi.

– Sondyqtan biz bes jyl ishinde Qazaqstanda atalǵan salada 1 mıllıon adamdy oqytýǵa qatysty aldymyzǵa úlken maqsat qoıyp otyrmyz.

Ótken jyly frantsýz pedagogy Nıkolıa Sadırakpen (Ecole42 mektebiniń negizin qalaýshy) birlesip, Qazaqstanda Tomorrow School jasandy ıntellekt mektebi ashyldy. Ondaǵy bilim berý baǵdarlamasy oqytýshylardy qajet etpeıdi, jasandy ıntellekttiń ózi jańa daǵdylardy meńgerýge kómektesedi.

Sondaı-aq mektepte oqytýdyń ınnovatsııalyq oıyn ádisteri qoldanylady. Biz osyndaı erekshe tásil tájirıbesimen bólisýge ázirmiz, – dedi Oljas Bektenov.

Osyǵan deıin Memleket basshysy Qasym-Jomart Toqaev Alem.ai halyqaralyq jasandy ıntellekt ortalyǵynyń jumysymen tanysqan bolatyn.

Aıta keteıik, Digital Almaty forýmynda Belarýs, Qazaqstan, Qyrǵyzstan, Reseı jáne Armenııannyń úkimet basshylary tsıfrlyq jobalar kórmesimen tanysyp, plenarlyq sessııaǵa qatysyp jatyr.