Qazaqstan jasandy ıntellektini damytýda qandaı sharalardy atqardy
ASTANA. KAZINFORM — QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev Jasandy ıntellektini damytý jónindegi keńestiń alǵashqy otyrysynda elde atqarylǵan mańyzdy jumystardy atady.
— Bul keńes jasandy ıntellekt salasynda moıyndalǵan álemdik kóshbasshylar bolyp sanalatyn 16 halyqaralyq músheni biriktirip, óziniń erekshe saraptamalyq deńgeıimen erekshelenedi. Bul — álemde teńdesi joq biregeı sarapshylar toby. Jasandy ıntellekt Qazaqstan úshin basym baǵyt jáne biz úsh negizgi salaǵa shoǵyrlanamyz: ınstıtýtsıonaldyq qurylymdy qalyptastyrý, ınfraqurylymdy damytý jáne adamı kapıtaldy jetildirý, — dedi sala mınıstri.
Instıtýtsıonaldyq qurylymymyzdyń negizi retinde elimizde Jasandy ıntellekt jáne tsıfrlyq damý mınıstrligi qurylǵan. Jasandy ıntellekt týraly zań jobasy ázirlenip, Parlamentte qaraýyna jiberildi jáne JI qoldanýdyń quqyqtyq ári etıkalyq negizderi aıqyndaldy.
— Qazaqstan ozyq tehnologııalyq ınfraqurylymdy damytyp keledi. Shilde aıynda biz Ortalyq Azııadaǵy eń iri klaster «ALEM Cloud» ulttyq sýperkompıýter ortalyǵyn iske qostyq. Taǵy bir mańyzdy qadam — óńirdegi alǵashqy ulttyq tildik modelder — KazLLM jáne AlemLLM-niń jasalýy. Bıyl biz ulttyq JI platformasyn iske qostyq, ol derekterdi, esepteý resýrstaryn jáne úlken tildik modelderdi qoljetimdi etip, baǵdarlamalaý daǵdylarynsyz JI agentterin jasaýǵa múmkindik beredi, — dedi J. Mádıev.
Sonymen birge, erteń «ALEM AI» halyqaralyq ortalyǵy jumysyn bastaıdy. Onyń maqsaty — barlyq salada sheshimder ázirleý úshin sarapshylardy, jańashyldardy jáne sheshim qabyldaýshylardy biriktirý. Instıtýttar men ınfraqurylymnan bólek, Qazaqstan adamı kapıtaldy damytýǵa da aıryqsha kóńil bólmek.
Aıta keteıik, Jasandy ıntellektini damytý jónindegi keńes Prezıdent Jarlyǵymen qurylǵan jáne ol — eldegi JI damytýdyń strategııasyn qalyptastyratyn, tehnologııalardy ekonomıkanyń negizgi salalary men memlekettik basqarýǵa engizýdi súıemeldeıtin, sondaı-aq salalyq baǵdarlamalar men strategııalyq qujattarǵa usynystar ázirleıtin keńesshi-konsýltatıvtik organ.
Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.