Qazaqstan jasandy ıntellektini bilim berý júıesine engizýdiń ulttyq modelin bekitti
ASTANA. KAZINFORM – Oqý-aǵartý mınıstri Ǵanı Beısembaev pen Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev 2025–2029 jyldarǵa arnalǵan orta, tehnıkalyq jáne kásiptik, sondaı-aq orta bilimnen keıingi bilim berý júıesine jasandy ıntellektini engizýdiń tujyrymdamalyq negizderin bekitý týraly birlesken buıryqqa qol qoıdy. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi málimdedi.
Qujat Memleket basshysynyń Qazaqstan halqyna Joldaýynda berilgen tapsyrmasy aıasynda ázirlenip, bilim berý júıesin jańǵyrtýdyń mańyzdy kezeńine aınaldy. Alǵash ret bilim berý salasynda jasandy ıntellektini qoldanýdyń biryńǵaı ulttyq standarttary bekitilip, oǵan etıka, quqyqtyq retteý, derbes derekterdi qorǵaý jáne akademııalyq adaldyq máseleleri engizildi.
Tujyrymdama mektepterdi, tehnıkalyq jáne kásiptik bilim berý uıymdaryn qamtıdy. Ol JI arnalǵan taqyryptardy oqý protsesine engizýdi, tsıfrlyq oqýlyqtar shyǵarýshy, bilim alýshylardyń JI boıynsha saýattylyǵyn qalyptastyrýdy, jobalyq qabiletterdi damytýdy, sondaı-aq oqytýshylardyń biliktiligin Acquire → Deepen → Create úsh satyly úlgisi boıynsha jetildirýdi qamtamasyz etedi.
Qujatta balanyń quqyqtaryn qorǵaý men pedagogtiń kásibı bedelin saqtaý máselesine aıryqsha mán berilgen. Mektepter men kolledjderde jasandy ıntellektini paıdalanýdaǵy etıka men akademııalyq adaldyqtyń ortaq qaǵıdalary bekitiledi.
– Birlesken buıryqqa qol qoıý – elimizdiń bilim berý júıesin damytýdyń jańa belesi. Tujyrymdama strategııalyq basymdyqtardy naqtylap qana qoımaı, ony iske asyrýdyń aıqyn mehanızmin, monıtorıng júıesin jáne jol kartasyn bekitedi. Bul jasandy ıntellektini mektepter men kolledjderde júıeli ári qaýipsiz engizýge jaǵdaı jasaıdy. Jasandy ıntellekt pedagogtiń ornyn baspaıdy, qaıta onyń rólin arttyrady. Sebebi bilim berý protsesindegi túpkilikti sheshimderdi adam qabyldaıdy, – dedi Ǵanı Beısembaev.
– Bilim berý salasyna jasandy ıntellektini engizý – Qazaqstannyń aýqymdy tsıfrlyq jańǵyrý strategııasynyń quramdas bóligi. Biz balalar men jastardyń tek zamanaýı quraldardyń qoldanýshysy emes, solardyń qurastyrýshysy bolýyna múmkindik ashyp otyrmyz. Tujyrymdama – bolashaq tehnologııalaryn erkin meńgergen, sonymen qatar ulttyq qundylyqtar men akademııalyq adaldyqty saqtaǵan jańa býyndy qalyptastyrýǵa jol ashady, – dep atap ótti Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev.
Aıta keteıik, 2025–2026 oqý jylynan bastap «Tsıfrlyq saýattylyq» pen «Informatıka» pánderine jasandy ıntellekt elementteri engizildi. Oqýshylar úshin Day of AI ádistemelik kesheni ázirlenip, pedagogter úshin arnaıy biliktilikti arttyrý baǵdarlamalary iske qosyldy.
Qazaqstan ıÝNESKO, EYDU jáne Eýropalyq odaqtyń usynymdaryn negizge ala otyryp, bul baǵytta ózindik ulttyq jolyn aıqyndaǵan alǵashqy elderdiń biri boldy.
Aıta keteıik, salyq organdary jasandy ıntellektini qoldanatyn bolady.