Qazaqstan jasandy ıntellektini bilim berý júıesine engizýdiń ulttyq modelin bekitti
ASTANA. KAZINFORM - Búgin Oqý-aǵartý mınıstri Ǵanı Beısembaev pen Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev 2025–2029 jyldarǵa arnalǵan orta, tehnıkalyq jáne kásiptik, sondaı-aq orta bilimnen keıingi bilim berý júıesine jasandy ıntellektini engizýdiń tujyrymdamalyq negizderin bekitý týraly birlesken buıryqqa qol qoıdy.
Bul týraly QR Oqý-aǵartý mınıtsrliginiń baspasóz qyzmeti habarlady.
Qujat Memleket basshysynyń Qazaqstan halqyna Joldaýynda berilgen tapsyrmasy aıasynda ázirlenip, bilim berý júıesin jańǵyrtýdyń mańyzdy kezeńine aınaldy. Alǵash ret bilim berý salasynda jasandy ıntellektini qoldanýdyń biryńǵaı ulttyq standarttary bekitilip, oǵan etıka, quqyqtyq retteý, derbes derekterdi qorǵaý jáne akademııalyq adaldyq máseleleri engizildi.
Bul tujyrymdama mektepterdi ǵana emes, tehnıkalyq jáne kásiptik bilim berý uıymdaryn da qamtıdy. Ol jasandy ıntellektke arnalǵan arnaıy taqyryptardy oqý protsesine engizýdi, zamanaýı tsıfrlyq oqýlyqtar shyǵarýdy, oqýshylardyń JI boıynsha saýattylyǵyn qalyptastyrýdy jáne olardyń jobalyq qabiletterin damytýǵa jaǵdaı jasaýdy kózdeıdi. Sonymen qatar, pedagogterdiń kásibı deńgeıin Acquire → Deepen → Create úshsatyly úlgisi boıynsha jetildirýdi qamtamasyz etedi.
Qujatta balanyń quqyqtaryn qorǵaý men pedagogtiń kásibı bedelin saqtaý máselesine aıryqsha mán berilgen. Mektepter men kolledjderde jasandy ıntellektini paıdalanýdaǵy etıka men akademııalyq adaldyqtyń ortaq qaǵıdalary bekitiledi.
«Birlesken buıryqqa qol qoıý – elimizdiń bilim berý júıesin damytýdyń jańa belesi. Tujyrymdama strategııalyq basymdyqtardy naqtylap qana qoımaı, ony iske asyrýdyń aıqyn mehanızmin, monıtorıng júıesin jáne jol kartasyn bekitedi. Bul jasandy ıntellektini mektepter men kolledjderde júıeli ári qaýipsiz engizýge jaǵdaı jasaıdy. Jasandy ıntellekt pedagogtiń ornyn baspaıdy, qaıta onyń rólin arttyrady. Sebebi, bilim berý protsesindegi túpkilikti sheshimderdi adam qabyldaıdy», – dedi mınıstr Ǵanı Beısembaev.
Qazaqstan ıÝNESKO, EYDU jáne Eýropalyq odaqtyń usynymdaryn negizge ala otyryp, bul baǵytta ózindik ulttyq jolyn aıqyndaǵan alǵashqy elderdiń biri boldy.
«Bilim berý salasyna jasandy ıntellektini engizý – Qazaqstannyń aýqymdy tsıfrlyq jańǵyrý strategııasynyń quramdas bóligi. Biz balalar men jastardyń tek zamanaýı quraldardyń qoldanýshysy emes, solardyń qurastyrýshysy bolýyna múmkindik ashyp otyrmyz. Usynylyp otyrǵan tujyrymdama – bolashaq tehnologııalaryn erkin meńgergen, sonymen qatar ulttyq qundylyqtar men akademııalyq adaldyqty saqtaǵan jańa býyndy qalyptastyrýǵa jol ashady», – dep atap ótti Jaslan Madıev.
Aıta keteıik, 2025–2026 oqý jylynan bastap «Tsıfrlyq saýattylyq» pen «Informatıka» pánderine jasandy ıntellekt elementteri engizildi. Oqýshylar úshin Day of AI ádistemelik kesheni ázirlenip, pedagogter úshin arnaıy biliktilikti arttyrý baǵdarlamalary iske qosyldy.
Osyǵan deıin jappaı tsıfrlandyrý, jasandy ıntellekt Joldaýdyń negizgi arqaýy bolǵany týraly jazdyq.