Qazaqstan jasandy ıntellekt pen bilim berý salasyndaǵy Hanchjoý bastamasyna qosyldy
ASTANA. KAZINFORM — Oqý-aǵartý mınıstri Juldyz Súleımenova Qytaı Halyq Respýblıkasynyń (QHR) Chjetszıan provıntsııasynyń Hanchjoý qalasynda ótken Dúnıejúzilik tsıfrlyq bilim berý konferentsııasy — 2026 (World Digital Education Conference) is-sharasyna qatysty.
Mınıstrliktiń baspasóz qyzmeti atap ótkendeı, konferentsııany QHR Bilim mınıstrligi men Chjetszıan provıntsııasynyń halyq úkimeti uıymdastyrdy. Іs-shara bilim berýdi tsıfrlyq transformatsııalaý máselelerin talqylaý úshin memlekettik organdardyń, halyqaralyq uıymdardyń, bilim berý salasy men sarapshylyq qaýymdastyq ókilderiniń basyn qosty.
Konferentsııa barysynda qazaqstandyq delegatsııa ashylý rásimine, plenarlyq otyrysqa jáne tsıfrlyq bilim berý ortasyn damytýǵa, jasandy ıntellekt tehnologııalaryn engizýge, bilimniń qoljetimdiligin qamtamasyz etýge jáne tsıfrlyq ekonomıkaǵa qajetti kadrlardy daıarlaýǵa arnalǵan paneldik sessııalarǵa qatysty.
Pedagogter men bilim alýshylardyń tsıfrlyq daǵdylaryn damytý, bilim berý úderisin daralandyrý, derekterdiń qaýipsizdigin qamtamasyz etý jáne bilim berýde jasandy ıntellektini qoldanýdyń etıkalyq qaǵıdattaryn qalyptastyrý máselelerine erekshe nazar aýdaryldy.
Konferentsııa qorytyndysy boıynsha Juldyz Súleımenova jasandy ıntellekt pen bilim berý salasyndaǵy Hanchjoý bastamasyn qabyldaý rásimine qatysty.
— Qujat bilim berý salasynda jasandy ıntellekt tehnologııalaryn jaýapty, adamǵa baǵdarlanǵan jáne ınklıýzıvti túrde qoldanýǵa baǵyttalǵan halyqaralyq ustanymdardy qamtıdy. Konferentsııaǵa qatysý bilim berýdi tsıfrlandyrý baǵytyndaǵy ozyq halyqaralyq tájirıbeni zerdeleýge jáne Qazaqstannyń bilim berý júıesinde jasandy ıntellektini damytýdyń keleshekti baǵyttaryn aıqyndaýǵa múmkindik berdi, — delingen habarlamada.
Osyǵan deıin OpenAI Qazaqstannyń bilim júıesine jasandy ıntellekt engizýge atsalysatynyn jazǵanbyz.
