Qazaqstan jas fýtbolshylardy daıyndaýǵa sheteldik bapkerlerdi tartpaq
«Sheteldik bapker mamandardy tartý - álemdik fýtbolda jalpy qabyldanǵan tájirıbe. Osyǵan baılanysty kásibı klýbtar úshin irikteý jumysyn júrgizý maqsatynda «Ońtústik» (Shymkent) jáne «Qaırat» (Almaty) fýtbol akademııalarynda Ispanııa men Germanııanyń sheteldik bapkerleri jumys isteıdi. Odan bólek, Premer-Lıga men Birinshi lıgada óner kórsetetin óńirlik komandalardyń kóbi sheteldik bapkerler men mamandardyń qyzmetin paıdalanady», - deıdi Úkimet basshysy.
Bul rette Premer-Mınıstr sheteldik mamandardyń kómekshileri otandyq bapkerler ekenin, olar sheteldik áriptesterdiń tájirıbesin alatynyn atap ótken.
«Keleshekte bapkerlik qyzmet jasaýǵa ÝEFA lıtsenzııasyn alǵan soń olar bilimi men tájirıbesin ózderiniń bapker retindegi jumysynda qoldana alady. Sondaı-aq qazaqstandyq jastar arasynan fýtboldan sapaly sporttyq rezervti daıyndaý úshin Mádenıet jáne sport mınıstrligi Qazaqstandyq fýtbol federatsııasymen birlesip Ekinshi, lıga klýbtarynda oınaıtyn jas dýbler fýtbolshylardy daıyndaý úshin sheteldik bapkerlerdi tartý máselesin qaraýdy josparlap otyr», - deıdi Asqar Mamın.
Aıta keteıik, osy jyldyń 23 qańtarynda Májilistiń bir top depýtaty sol kezdegi Premer-Mınıstr Baqytjan Saǵyntaevtyń atyna resmı saýal joldap, otandyq kadrlardy jáne qazaqstandyq jastar arasynan fýtboldan sapaly sport rezervin daıarlaý maqsatynda sheteldik mamandardy tartý qajettigin atap ótken edi.
