Qazaqstan jarty jylda 306 mln dollarǵa IT qyzmetterdi eksporttady

ASTANA. KAZINFORM – Elimizde IT-qyzmetter eksporty qarqyndy ósip keledi. Tolyǵyraq Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtyp berdi.

«2023 jyly eksport kólemi 529 mln dollarǵa jetti, al bıyl birinshi jartyjyldyqta bul kórsetkish 306 mln dollarǵa jetti. Memleket basshysynyń tapsyrmasyna sáıkes 2026 jylǵa qaraı 1 mıllıard dollarǵa jetedi dep senim artamyz. Búginde Qazaqstannyń IT qyzmetteri 86 elge eksporttalady. Bul bizdiń tsıfrlyq sheshimderge joǵary suranysty jáne jahandyq deńgeıde básekege qabiletimizdi rastaıdy», - dedi Jaslan Mádıev Úkimet otyrysynda. 

Odan ári mınıstr ІT salasyna qatysty elimizde ótken halyqaralyq deńgeıdegi forýmdar men konferentsııalarǵa toqtaldy. 

«2024 jylǵy 3-5 qyrkúıek aralyǵynda Qazaqstanda alǵash ret Astana qalasynda tsıfrlyq ınklıýzııa jáne transformatsııa boıynsha Azııa-Tynyq muhıty mınıstrlik konferentsııasy ótti. Konferentsııaǵa 30-dan astam elden 186 delegat qatysty. Jalpy qatysýshylar sany 1500 adamnan asty. Astana mınıstrlik deklaratsııasyn qabyldaý boldy. Bıyl 15-20 qyrkúıek aralyǵynda Qazaqstan alǵash ret ICPC — álemdegi eń iri stýdenttik sporttyq baǵdarlamalaý chempıonatyn qabyldady. Bul oqıǵa eldiń Ortalyq Azııadaǵy IT hab retindegi pozıtsııasyn nyǵaıtty. 110 elden 73 000 qatysýshynyń ishinen fınalǵa 50 elden 142 komanda ótti, al halyqaralyq aqparattyq tehnologııalar ýnıversıteti komandasy álemniń eń úzdik 30 komandasy qataryna endi. Sonymen qatar 2018 jyldan bastap «Digital Bridge» jáne «Digital Almaty» halyqaralyq forýmy sııaqty mańyzdy is-sharalar ótkizilip keledi. Bul forýmdar jyl saıyn 30 myńnan astam qatysýshyny tartady», - deıdi ol. 

Aıta ketsek, taıaýda Úkimet basshysy Oljas Bektenov amerıkalyq kompanııa basshysymen IT sheshimderdiń damýyn talqylaǵan edi.