Qazaqstan Japonııamen tótenshe jaǵdaıdyń aldyn alýda ózara is-áreketti nyǵaıtady

ASTANA. KAZINFORM — Qazaqstan Respýblıkasy Premer-mınıstriniń orynbasary — Syrtqy ister mınıstri Murat Nurtileý Qazaqstan men Japonııa arasynda perspektıvaly salalardy damytý, ortaqtasyp árekettesý týraly sóz etti.

— Japonııanyń birlesken kredıtteý mehanızmi sheńberinde Qazaqstanda jańartylǵan energııa kózin damytý eki memlekettiń múddesine saı. Tótenshe jaǵdaılardyń aldyn alýda is-áreketti nyǵaıtý jan-jaqty talqylandy. Oraıly sátti paıdalanyp, Japonııa Úkimetine sý tasqynyna qarsy júıeni damytýǵa arnalǵan qaıtarymsyz kómek kórsetkeni úshin alǵys bildiremiz (2 mln doll.), — dedi Murat Nurtileý BAQ aldynda málimdeme jasap.

Mınıstrdiń málimdeýinshe, eki el arasyndaǵy mádenı-gýmanıtarlyq baılanys jyldan-jylǵa órkendep jatyr.

— Búginde júzden astam otandasymyz Kúnshyǵys eliniń eń iri ýnıversıtetterinde bilim alyp jatyr. Biz Japonııanyń aldyńǵy qatarly joǵary oqý oryndarynyń Qazaqstanda fılıalyn ashýǵa jaǵdaı jasaýǵa daıynbyz. Sonymen qatar, Japonııamen is-árekettestikte azyq-túlik qaýipsizdigi, óndiristik kooperatsııa, farmatsevtıka, adam resýrstary jáne aqparattyq tehnologııa sııaqty salalar boıynsha áleýeti asa mol. Aldaǵy ýaqytta áriptesim Takeshı Ivaıa myrzamen atalǵan baǵyttar boıynsha tyǵyz jumys júrgizýge nıettimin, — deıdi vedomstvo basshysy.

Búgin Astanaǵa alǵash resmı saparmen Japonııa Syrtqy ister mınıstri Takeshı Ivaıa keldi. Kezdesý barysynda ekijaqty qarym-qatynasty jańa deńgeıge kóterý jolyndaǵy máseleler talqylandy. 

Aıta keteıik, Japonııa Semeı polıgonynan zardap shekkenderge qaıtarymsyz grant bólmek. 

Málimdeme barysynda belgili bolǵandaı, 2026 jyly «Almaty-Tokıo» tikeleı áýe reısi ashylady.

Buǵan deıin habarlaǵanymyzdaı, Prezıdent jyl sońynda resmı saparmen Japonııaǵa barýy múmkin. 

Sondaı-aq Japonııa Qazaqstanda iri ınvestor elderdiń ondyǵyna kiredi.