Qazaqstan Japonııa jáne Koreıamen birlesken ǵylymı jobalar men AI kadrlaryn daıarlaýdy kózdeıdi
ASTANA. KAZINFORM – QR Ǵylym jáne joǵary bilim mınıstri Saıasat Nurbek Japonııa men Koreıa Respýblıkasynyń jetekshi ýnıversıtetteri jáne ǵylymı-tehnologııalyq uıymdarynyń basshylarymen birqatar kezdesýler ótkizdi, dep habarlaıdy QR Ǵylym jáne joǵary bilim mınıstrliginiń baspasóz qyzmeti.
Kezdesýler barysynda akademııalyq seriktestikti damytýǵa, birlesken zertteýler júrgizýge, kadrlar daıarlaýǵa, sondaı-aq jasandy ıntellekt jáne tsıfrlyq tehnologııalar salalaryndaǵy yntymaqtastyqqa basymdyq berildi.
Tokıoda Tokyo Metropolitan University jáne Birikken Ulttar Uıymy Ýnıversıtetiniń (UNU) basshylyǵymen kezdesýler ótti. Tokyo Metropolitan University rektory Takae Ohashımen joǵary oqý oryndary arasyndaǵy ózara is-qımyldy keńeıtý, akademııalyq utqyrlyqty damytý, oqytýshylar men zertteýshiler arasynda tájirıbe almasý, sondaı-aq birlesken bilim berý jáne ǵylymı jobalardy iske asyrý perspektıvalary talqylandy. Mınıstr ýnıversıtet rektoryn qarasha aıynda Astanada ótetin Strategııalyq seriktester forýmyna shaqyrdy.
Japonııadaǵy kelissózderdiń mańyzdy baǵyttarynyń biri Birikken Ulttar Uıymy Ýnıversıtetimen yntymaqtastyqty damytý boldy. BUU Ýnıversıtetiniń rektory - BUU Bas hatshysynyń orynbasary, professor Tshılıdzı Marvalamen ǵylym, joǵary bilim, ǵylymı zertteýler jáne turaqty damý salalaryndaǵy ózara is-qımyl perspektıvalary talqylandy.
Memleket basshysynyń tapsyrmasyn iske asyrý aıasynda taraptar BUU Ýnıversıtetiniń Qazaqstandaǵy qyzmetin keńeıtýdiń yqtımal ınstıtýtsıonaldyq jáne praktıkalyq tetikterin qarastyrdy. Qazaqstan tarapy yntymaqtastyqty odan ári nyǵaıtýǵa múddeliligin bildirip, birlesken bastamalardy iske asyrý úshin qajetti jaǵdaılar jasaýǵa daıyn ekenin jetkizdi. BUU Ýnıversıtetiniń rektory Astanada ótetin Strategııalyq seriktester forýmyna qatysýǵa shaqyrýdy qabyldady.
Halyqaralyq seriktestikti nyǵaıtý baǵytyndaǵy jumystyń jalǵasy Seýlde ótken kelissózdermen jalǵasty. Mınıstr Koreıa Respýblıkasynyń Premer-mınıstriniń orynbasary - ǵylym jáne aqparattyq-kommýnıkatsııalyq tehnologııalar mınıstri Pe Ken Hýnmen kezdesti. Taraptar ǵylym, joǵary bilim jáne jasandy ıntellekt salalaryndaǵy yntymaqtastyqty odan ári damytý, onyń ishinde tehnologııalar transferi, birlesken zertteýlerdi iske asyrý jáne joǵary bilikti mamandar daıarlaý máselelerin talqylady.
Osyǵan deıin Qazaqstan men Fınlıandııa strategııalyq shıkizat boıynsha jańa tehnologııalardy synaqtan ótkizetini týraly jazdyq.
