Qazaqstan – Japonııa teketiresinde Zarına Dııastyń nege oınamaıtyny belgili boldy
ASTANA. KAZINFORM — Qazaqstan tennıs federatsııasynyń vıtse-prezıdenti Dıas Dosqaraev Tokıoda 12-13 sáýirde ótetin Bıllı Djın Kıng kýbogynyń Japonııamen irikteý matchynda Zarına Dııastyń alǵashqy kúni nege oınamaıtynyn túsindirdi.
Dıas Dosqaraevtyń aıtýynsha, Zarına jaraqatyna baılanysty eki jyl jarystan tys qalǵandyqtan, áli tolyq qalpyna kele qoıǵan joq.
«Soǵan qaramastan, Zarına Tokıoǵa 10 kún buryn kelip, tynbaı jattyǵyp jatyr. Ol úshin el namysyn qorǵaý qashanda abyroı. Komanda kapıtany básekeden keminde bir saǵat buryn oıynshyny almastyra alady. Sondyqtan áli de kóremiz», - dedi D.Dosqaraev.
Eske sala keteıik, budan buryn Beıbit Juqaevtyń juptyq synda Meksıkadaǵy týrnırdiń shırek fınalyna ótkenin jazǵan bolatynbyz. Anna Danılına Qazaqstan – Japonııa matchyn bastaıdy.
