Qazaqstan-Japonııa seriktestigi Nursultan Nazarbaevtyń árdaıym erekshe nazarynda boldy - sarapshy

ALMATY. QazAqparat – Qazaqstan men Japonııanyń qarym-qatynasy QR Tuńǵysh Prezıdenti Nursultan Nazarbaevtyń qashan da erekshe nazarynda boldy. Bul týraly QR Tuńǵysh Prezıdenti – Elbasy qory janyndaǵy Álemdik ekonomıka jáne saıasat ınstıtýtynyń (ÁESI) sarapshysy Lıdııa Parhomchık aıtty, dep habarlaıdy QazAqparat tilshisi.

Lıdııa Parhomchıktiń aıtýynsha, 2016 jyly Memleket basshylary qol qoıǵan «Azııanyń órkendeýi dáýirindegi erekshe strategııalyq áriptestik týraly» birlesken málimdemesi eki el arasyndaǵy yntymaqtastyqqa jańa serpin berýge Nur-Sultan men Tokıonyń múddeliligin aıqyn kórsetedi. Sondyqtan, Elbasynyń Imperator Narýhıtony ulyqtaý rásimine qatysý úshin Japonııaǵa sapary aıasynda atalmysh el premeri Sındzo Abemen saýda-ekonomıkalyq qatynastardy odan ári damytý boıynsha aldaǵy qadamdardy talqylaýy tańǵalarlyq jaǵdaı emes.

«Aıta ketý kerek, 2018 jyl ekijaqty saýdany arttyrý turǵysynan Qazaqstan men Japonııa úshin óte sátti boldy. Osylaısha, jyldyń qorytyndysy boıynsha saýda kóleminiń ósýi 53,8% qurady. Bul osy kórsetkishti 2 mlrd dollar deńgeıge deıin ulǵaıtýǵa múmkindik berdi. 2019 jyldyń qańtar-tamyz aılary aralyǵynda taraptar tutastaı alǵanda saýda dınamıkasyn saqtap qaldy. Kórsetilgen kezeńdegi saýda-sattyq kólemi 1,13 mlrd dollardy qurady», - dedi sarapshy.

Sonymen qatar, ol Japonııa Qazaqstan ekonomıkasyndaǵy eń iri ınvestorlardyń biri ekenin atap ótti.

«Máselen, sońǵy 10 jyl ishinde Japonııanyń Qazaqstan ekonomıkasyna tikeleı sheteldik ınvestıtsııalar aǵyny 6 mlrd dollar kóleminen asty. Qazaqstan úshin Japonııamen yntymaqtastyqtyń basym baǵyty tehnologııalyq ózara is-qımyl, onyń ishinde japondyq tehnologııalardy tıimdi engizý jáne noý-haý salasy bolyp qala beredi. Eki el arasyndaǵy arasyndaǵy tikeleı eki jaqty baılanys pen »Ortalyq Azııa+Japonııa« formatyndaǵy kópjaqty kelissózder tolyq aýqymdy ekonomıkalyq yntymaqtastyqtyń «jol kartasyn» odan ári damytý úshin jaǵdaı jasaıtyny sózsiz», - deıdi ol.

ÁESI sarapshysy atap ótkendeı, Qazaqstan men Japonııa arasyndaǵy strategııalyq seriktestiktiń áleýeti zor. Sondyqtan, Tuńǵysh Prezıdent Nursultan Nazarbaev óziniń qazirgi jańa statýsynda Qazaqstannyń syrtqy saıasatyn belsendi iske asyrýshy bolyp qala otyryp, Tokıomen tyǵyz jáne dostyq baılanystardy nyǵaıtýǵa aıtarlyqtaı kúsh salýda.